Musliu: Kosova duhet të ndalojë Listën Serbe, njësoj si Gjermania po shqyrton ndalimin e AfD-së

Prishtinë, 23 gusht 2025

Eksperti i çështjeve të sigurisë, Agim Musliu, ka deklaruar se Kosova duhet të marrë shembull nga Gjermania, e cila po shqyrton ndalimin e partisë së ekstremit të djathtë AfD, dhe të veprojë njësoj me Listën Serbe. Sipas tij, kjo parti përbën një kërcënim serioz për rendin kushtetues dhe sigurinë e vendit.

Në një reagim në Facebook, Musliu ka shkruar se Kosova duhet të përballet me “armiqtë e demokracisë” duke marrë masa të guximshme.

“Nëse Gjermania, një ndër demokracitë më të konsoliduara, e konsideron AfD-në rrezik, Kosova ka arsye shumë më të forta për të shqyrtuar ndalimin e Listës Serbe, që funksionon si instrument i Beogradit për të minuar shtetësinë tonë”, tha ai.

Ai kujtoi se një nga figurat kyçe të Listës Serbe, Millan Radoiçiq, është përgjegjës për sulmin terrorist në Banjskë, për sulme ndaj KFOR-it dhe Policisë së Kosovës, si dhe për përfshirjen në vrasjen e politikanit serb Oliver Ivanoviq.

Musliu e cilësoi vendimin e Komisionit Qendror të Zgjedhjeve për të mos certifikuar Listën Serbe si “një hap të domosdoshëm dhe një sinjal të qartë se paradoksi politik duhet të trajtohet seriozisht”.

Sipas tij, Lista Serbe “asnjëherë nuk e ka fshehur qasjen sabotuese ndaj Kosovës, qoftë përmes deklaratave publike apo veprimeve të organizuara që kanë rrezikuar rendin demokratik”. Ai shtoi se organet e drejtësisë duhet të ndërmarrin hetime dhe masa konkrete.