Katër nga pesë autorë të vrasjeve të fundit në Kosovë ende në arrati – Lugina dyshohet si strehë

14 gusht, 2025

Nga pesë vrasjet e fundit të regjistruara në Kosovë, katër të dyshuar ende nuk janë kapur nga Policia e Kosovës. Mes tyre janë Mefail Shkodra dhe djemtë e tij, Edonisi e Engjulli, të dyshuar për vrasjen e trefishtë në Gjilan, si dhe Xhemail Nuhiu, i kërkuar për një vrasje në Hajvali.

Sipas ekspertit të sigurisë, Avni Islami, një nga arsyet kryesore pse këta persona ende janë në arrati është mundësia e ikjes në Serbi, veçanërisht në komunat shqiptare në Luginë, ku, për shkak të mungesës së bashkëpunimit mes dy shteteve, nuk ndodhin ndjekje penale nga autoritetet serbe për shtetasit kosovarë.

Kufiri me Serbinë dhe pikat e kontrollit
Departamenti i Kufirit i Policisë së Kosovës njofton se aktualisht janë 16 pika të kalimit kufitar dhe 12 stacione policore përgjegjëse për mbikëqyrjen e kufirit, nga të cilat 6 pika lidhin Kosovën me Serbinë.

Pikat kryesore të kalimit në drejtim të Serbisë nën kontrollin e Drejtorisë Rajonale Kufitare “Veriu” në Lluzhan janë:

Merdare

Jarinje

Bernjak

Mutivodë

Ndërkohë, stacionet policore për mbikëqyrje përfshijnë Keqekollën, Kërpimehin, Leposaviqin dhe Zubin Potokun.

Drejtoria Rajonale Kufitare “Lindje” në Kaçanik mbikëqyr dy pika kalimi që lidhin Kosovën me Preshevën dhe Bujanocin:

Muçibaba

Dheu i Bardhë

Modeli i policimit
Policia e Kosovës thekson se në këto pika kufitare zbatohet një model policimi i bazuar në vëzhgim, identifikim dhe reagim, duke u mbështetur në informata inteligjente mbi lëvizjet kriminale dhe analizën e rrezikut. Ky model, sipas Policisë, është përzgjedhur për të përmirësuar cilësinë e shërbimit dhe për të reflektuar praktikat më të mira të vendeve të Bashkësisë Evropiane.

Pikat kufitare të pa hapura
Mes Kosovës dhe Serbisë ekzistojnë edhe pika kufitare që ende nuk janë funksionale për kalim. Një prej tyre është pika në “KAPI”, që lidh Kamenicën me Medvegjën. Lidhur me këtë çështje, televizioni ka kontaktuar Ministrinë e Punëve të Brendshme, por nuk ka marrë përgjigje.