Lista Studentore rrëzoi Vuçiqin, por jo retorikën nacionaliste ndaj Kosovës

Prishtinë, 9 nëntor 2026 17:04

Fitorja e Listës Studentore në zgjedhjet parlamentare në Serbi dhe largimi i Aleksandar Vuçiqit nga pushteti nuk duket se do të sjellin ndryshim të qëndrimit të Beogradit ndaj Kosovës. Deklaratat e fundit të përfaqësuesve të kësaj liste, pas vizitës në Graçanicë, dëshmojnë vazhdimësinë e qasjes nacionaliste ndaj shtetësisë së Kosovës.

Gjatë vizitës së tyre në Kosovë, përfaqësuesit e Listës Studentore kanë përsëritur qëndrimet nacionaliste.

Kandidati i kësaj liste, Fegja Dimoviq, ka deklaruar se Kosova zë një vend të rëndësishëm në programin politik të lëvizjes.

Pas vizitës në Kosovë, Dimoviq ka shkruar se nga ky udhëtim janë kthyer me forcën që, sipas tij, do t’u nevojitet për ta çliruar vendin nga krimi i organizuar, ndërsa serbëve në Kosovë u ka përcjellë mesazh solidariteti, duke premtuar se nuk do t’i harrojnë.

Delegacioni i Listës Studentore, ku ishin edhe disa kandidatë për deputetë, gjatë fundjavës ka vizituar Manastirin e Graçanicës, ku është takuar me mitropolitin e Rashkës dhe Prizrenit, Teodosije.

Sipas njoftimit të Dioqezës së Rashkës dhe Prizrenit, në takim është diskutuar për pozitën e komunitetit serb në Kosovë, të drejtat e tij dhe mbrojtjen e objekteve fetare ortodokse.

Përfaqësuesit e kësaj liste kanë shprehur gatishmërinë që, përmes angazhimit të tyre të ardhshëm institucional, t’u kushtojnë vëmendje këtyre çështjeve.

Ndërkohë, më 7 nëntor, kandidati i Listës Studentore nga Kosova, Jugosllav Gashiq, kishte deklaruar se nuk do të ketë bashkëpunim me Listën Serbe, të cilën e ka bërë përgjegjëse për përkeqësimin e pozitës së serbëve në Kosovë.

Lista Studentore, e cila fitoi zgjedhjet parlamentare të 25 tetorit në Serbi, duke siguruar 140 mandate, ka arritur t’i japë fund sundimit 14-vjeçar të Aleksandar Vuçiqit.

Megjithatë, qëndrimet e saj për Kosovën tregojnë se ndryshimi politik në Serbi nuk nënkupton domosdoshmërisht shkëputje nga politika tradicionale nacionaliste e Beogradit ndaj shtetësisë së Kosovës.