Konjufca: Sulmet në Banjskë dhe Ibër-Lepenc treguan kërcënimet ndaj sigurisë së Kosovës

Prishtinë, 13 tetor 2026 09:14

Zëvendëskryeministri i Parë dhe Ministri i Punëve të Jashtme dhe Diasporës, Glauk Konjufca, ka folur në Pragë për sfidat e sigurisë me të cilat është përballur Kosova, duke veçuar sulmin terrorist në Banjskë dhe sulmin ndaj kanalit të Ibër-Lepencit.

Konjufca mori pjesë në edicionin e 30-të të Forumit 2000, ku ishte pjesë e panelit “Bridging the Divide – Crafting a Transatlantic Roadmap for Tech & Economic Security”. Diskutimi u përqendrua në rëndësinë e bashkëpunimit transatlantik për paqen, sigurinë dhe stabilitetin në Ballkanin Perëndimor.

Gjatë fjalës së tij, Konjufca e paraqiti Kosovën si dëshmi konkrete të rezultateve të bashkëpunimit transatlantik, duke theksuar përparimin e vendit nga pasojat e luftës drejt konsolidimit si demokraci.

Ai tha se ky përparim është mbështetur në qëndrueshmërinë e institucioneve të Kosovës dhe në partneritetin me Shtetet e Bashkuara të Amerikës dhe Bashkimin Evropian.

Duke iu referuar sulmit të 24 shtatorit 2023 në Banjskë dhe sulmit ndaj infrastrukturës kritike në kanalin e Ibër-Lepencit, Konjufca theksoi se këto ngjarje dëshmojnë për ekzistencën e kërcënimeve serioze dhe përpjekjeve për destabilizimin e Kosovës.

Megjithatë, sipas tij, institucionet e Kosovës kanë treguar vendosmëri dhe kapacitet për t’u përballur me këto sfida dhe për të mbrojtur sigurinë e vendit, me mbështetjen e vazhdueshme të partnerëve transatlantikë.

Në përfundim, Konjufca theksoi se përvoja e Kosovës tregon rëndësinë e unitetit transatlantik dhe të ruajtjes së këtij partneriteti për sigurinë dhe të ardhmen e Ballkanit Perëndimor.