Vëlla e motër, viktimat e krimit të sotëm në Gjilan

Gjilan, 9 tetor 2026 20:43

Dy persona janë vrarë e një është plagosur nga të shtënat me armë në Livoç të Ulët të Gjilanit të premten. I dyshuari është dorëzuar.

Siç ka njoftuar Policia, në vend të ngjarjes brenda veturës është gjetur i vdekur një burrë 30-vjeçar, ndërsa në Spitalin e Gjilanit është dërguar pa shenja jete një grua po ashtu rreth 30-vjeçare.

Ndërkohë, një tjetër person që është lënduar nga arma e zjarrit, është dërguar për trajtim në Qendrën Klinike Universitare të Kosovës. E në mbrëmje, Naser Syla, drejtor i Klinikës Emergjente në QKUK, ka thënë se i plagosuri është në gjendje të rëndë. Ai ka bërë të ditur se personi është dërguar në sallë operative dhe më pas do të vazhdojë tretmanin në Intensivë.

Viktimat e këtij krimi janë motër e vëlla, ndërkohë nuk dihet ende motivi i kësaj vrasjeje të dyfishtë.