Prishtinë, 6 tetor 2026 06:50
Gjashtë zyrtarë policorë janë lënduar dhe 11 qytetarë apo protestues kanë kërkuar ndihmë mjekësore gjatë protestës së zhvilluar pranë institucioneve shtetërore në Prishtinë.
Sipas Policisë së Kosovës, gjatë protestës janë shoqëruar në stacion policor edhe tre persona, ndërsa për menaxhimin e situatës dhe shpërndarjen e turmës janë përdorur gaz lotsjellës dhe topi i ujit.
Policia ka deklaruar se gjatë orëve të mbrëmjes një pjesë e protestuesve kanë hedhur vazhdimisht mjete piroteknike, fishekzjarre dhe mjete të forta në drejtim të objekteve të Qeverisë dhe Kuvendit të Kosovës.
“Policia e Kosovës, me qëllim të vënies së situatës nën kontroll dhe parandalimit të eskalimit të mëtejshëm, është detyruar disa herë të veprojë ndaj protestuesve që kanë shfaqur dhunë”, thuhet në komunikatën e Policisë.
Për shkak të situatës së krijuar, në intervale të ndryshme është ndërprerë edhe qarkullimi i automjeteve në disa rrugë përreth qendrës së Prishtinës, me qëllim të garantimit të sigurisë së qytetarëve dhe pjesëmarrësve në trafik.
Policia ka bërë të ditur se tre protestues janë shoqëruar në stacion policor për shkak të mosrespektimit të urdhrave policorë dhe dyshimeve për veprime në kundërshtim me ligjin. Për rastet e tyre, sipas Policisë, veprimet e mëtejshme do të ndërmerren në koordinim me organet e drejtësisë.
Sa i përket bilancit të të lënduarve, Policia ka njoftuar se gjashtë zyrtarë kanë marrë trajtim mjekësor pas lëndimeve të pësuara gjatë përballjes me situatën në terren.
Në anën tjetër, ndihmë mjekësore kanë kërkuar edhe 11 qytetarë apo protestues.
Policia ka theksuar se përdorimi i masave policore, sipas saj, ka ndodhur vetëm në rastet kur protesta ka kaluar në veprime të dhunshme ndaj institucioneve ose zyrtarëve policorë.
“Policia e Kosovës për asnjë ditë dhe në asnjë rast nuk ka vepruar ndaj protestuesve të cilët kanë protestuar në mënyrë të qetë e demokratike”, thuhet në komunikatë.
Në orët e vona të natës, protesta po vazhdonte në gjendje të qetë, ndërsa njësitë policore mbetën në terren për të garantuar rendin dhe sigurinë publike.
Policia ka deklaruar se mbrojtja e qytetarëve, pronës publike e private dhe garantimi i së drejtës për protestë të qetë mbeten ndër prioritetet e saj.

Kamberi kërkon nga qeveria e re e Serbisë njohjen e diplomave të Kosovës
Kosova kalon në pagesa të shpejta, paratë do të transferohen 24/7
Nis rrënimi i gjashtë objekteve pa leje në zonën e Liqenit të Ujmanit
Kurti: Strukturat paralele në veri janë shkatërruar, 29 rrugë ilegale janë mbyllur
Miratohet në parim Projektbuxheti për vitin 2027
4.27 miliardë euro buxhet për 2027, paga e 13-të dhe 908 milionë euro për komunat
Ballkani mposht Gjilanin me përmbysje
Vdekje në vendin e punës në Istog, Prokuroria nis hetimet
Sveçla: Fabrika e municionit, dëshmi e partneritetit strategjik Kosovë–Turqi
118 vjet nga Kongresi i Manastirit, 22 Nëntori shënon bashkimin e shqiptarëve përmes alfabetit