Shaip Kamberi padit Ana Brnabiqin për nxitje të urrejtjes

Deputeti shqiptar në Parlamentin e Serbisë, Shaip Kamberi, ka dorëzuar kallëzim penal kundër kryetares së Kuvendit të Serbisë, Ana Brnabiq, për nxitje të urrejtjes kombëtare, racore dhe fetare.

Sipas Kamberit, padia është bërë së bashku me deputetët Ahmedin Skrijelj dhe Minela Kalender, si reagim ndaj deklaratave të Brnabiq lidhur me protestat në Novi Pazar. Ajo kishte thënë se “dëgjuam thirrjen ‘Allahu Ekber’ dhe gjëra të tjera të neveritshme”, deklaratë që Kamberi e cilëson si stigmatizuese ndaj besimit islam dhe identitetit të shqiptarëve myslimanë.

Kamberi thekson se kjo gjuhë përçon mesazhe urrejtjeje dhe përjashtimi, duke i paraqitur besimtarët myslimanë si të rrezikshëm dhe të huaj në shoqërinë serbe. “Kjo nuk është çështje politike apo morale, por para së gjithash është çështje ligjore dhe drejtësie”, ka shkruar ai.