Liderët e Luginës kërkojnë prani konkrete institucionale të Shqipërisë

Prishtinë, 22 gusht 2026 19:37

Propozimi për hapjen e një konsullate të Shqipërisë në Luginën e Preshevës, është mirëpritur nga liderët shqiptarë të kësaj zone në territorin e Serbisë. Në një takim të udhëheqësve të Luginës me ministrin e Jashtëm të Shqipërisë, Ferit Hoxha, hapja e një konsullate në Bujanoc është parë si një urë institucionale për shqiptarët me shtetin shqiptar.

Kryetarja e Komunës së Preshevës, Ardita Sinani, kryetari i Bujanocit, Arbër Pajaziti, deputeti në Kuvendin e Serbisë, Shaip Kamberi dhe kryetari i Këshillit Kombëtar Shqiptar në Serbi, Enkel Rexhepi takuan ministrin e Jashtëm të Shqipërisë, Ferit Hoxha të shtunën.

Në njoftimet në Facebook nga këta udhëheqës është thënë se në takim është diskutuar për nevojat konkrete të shqiptarëve të Luginës së Preshevës. Liderët e Preshevës kanë bërë thirrje për prani konkrete institucionale të Shqipërisë. E ministri Hoxha është zotuar për mbështetje konkrete.

Duke komentuar iniciativën për hapjen e një konsullate të Shqipërisë në Bujanoc, Sinani ka thënë se rëndësia e pranisë institucionale të Kosovës dhe Shqipërisë në Luginë është e domosdoshme duke marrë parasysh pengesat që Serbia nxjerr për fondet e Kosovës dhe të Shqipërisë për Luginën.

“Afrimi i përfaqësive institucionale në Luginën e Preshevës do të kishte një rëndësi të madhe për popullatën shqiptare këtu. Do të lehtësonte komunikimin e drejtpërdrejtë, adresimin e çështjeve me interes për qytetarët dhe lidhjen institucionale me Tiranën dhe Prishtinën. Prandaj, hapja e Konsullatës së Republikës së Shqipërisë në Bujanoc do të ishte shumë më tepër sesa hapja e një përfaqësie diplomatike. Do të ishte një prani konkrete e shtetit shqiptar pranë shqiptarëve të Luginës dhe një urë institucionale edhe më e afërt me ta”, ka shkruar Sinani në Facebook që ka shtuar se prania institucionale është ndër mënyrat më të rëndësishme “për ta mbajtur Luginën e Preshevës afër institucioneve të dy shteteve tona”.

Sikur Sinani, edhe deputeti Kamberi ka bërë thirrje për hapa konkretë nga qeveria shqiptare.

Kamberi ka thënë se hapja e një konsullate të Shqipërisë në Bujanoc do të ishte hap me rëndësi të veçantë politike dhe simbolike.

“Prania institucionale e Shqipërisë në Luginë është një dëshmi e vëmendjes së drejtpërdrejtë ndaj shqiptarëve dhe një mundësi për ta bërë edhe më të fortë lidhjen institucionale me Shqipërinë. Besoj se ky takim duhet të jetë pjesë e një bashkërendimi të vazhdueshëm dhe të institucionalizuar ndërmjet Tiranës dhe përfaqësuesve shqiptarë në Luginën e Preshevës. Për sfidat tona të përhershme nevojitet jo vetëm solidaritet, por strategji, këmbëngulje dhe veprim konkret”, ka shkruar ai.

Ndërkaq ministri Hoxha ka thënë se është diskutuar për mbrojtjen e të drejtave të shqiptarëve, ruajtjen e identitetit dhe forcimin e përfaqësimit të tyre në jetën politike dhe institucionale në Serbi si dhe për nevojat konkrete të qytetarëve të Luginës.

“Përfaqësimi real dhe i denjë, ruajtja dhe forcimi i identitetit kombëtar, arsimimi, zhvillimi ekonomik dhe mundësitë për të rinjtë nuk janë çështje episodike. Ato kërkojnë vëmendje të vazhdueshme, bashkërendim dhe veprim konkret”, ka shkruar Hoxha në rrjete sociale.

Ai ka thënë se të drejtat e shqiptarëve të Luginës, janë prioritet i Shqipërisë.

Në fund të korrikut u bënë publike diskutimet e Shqipërisë dhe të Serbisë për hapjen e zyrave konsullore: një shqiptare në Bujanoc dhe një serbe në Shkodër. Ministri i Jashtëm i Serbisë, Marko Gjuriq, pati thënë se është arritur një marrëveshje në parim, ndërsa ministri shqiptar pati sqaruar se bëhet fjalë vetëm për fazën e shprehjes së kërkesës nga të dyja palët. Kërkesa e Serbisë për konsullatë në Shkodër ishte shoqëruar me reagime të shumta kundërshtuese.

Sipas regjistrimit të fundit të popullatës në Shqipëri, në Qarkun Shkodër jetojnë vetëm 54 qytetarë të deklaruar si serbë, derisa në Serbi, po sipas regjistrimit të fundit, janë mbi 60 mijë shqiptarë, shumica në tri komunat e Luginës së Preshevës, pa përfshirë këtu edhe shumë prej atyre të cilëve u janë pasivizuar adresat nga autoritetet e Beogradit.

Po ashtu, sipas Konventës së Vjenës për Marrëdhëniet Konsullore, Shkodra me rreth 50 serbë, nuk plotëson asnjë kriter për të pasur konsullatë të Serbisë. Ndër kriteret kryesore janë numri i shtetasve, nevojat e tyre për shërbime konsullore dhe distanca e madhe me kryeqytetin ku ekziston ambasada.

Por Hoxha në deklaratat për media në fillim të gushtit, pati hedhur poshtë pretendimet se Serbisë po i mundësohet diçka që nuk i takon.