Ndalohet një person lidhur me rastin e vdekjes së punëtorit në KEK

Prishtinë, 21 gusht 2026 08:07

Prokuroria Themelore në Prishtinë pas humbjes së jetës së një punëtori të KEK-ut,  në kuadër të veprimeve hetimore ndaloi një person me inicialet A.K., për 48 orë, nën dyshimin e kryerjes së veprës penale ‘’Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’’.

“Prokuroria Themelore në Prishtinë, njofton opinionin publik se më datë 20.08.2026, rreth orës 14:50, Prokurori kujdestar nga Departamenti i Përgjithshëm është njoftuar lidhur me një aksident të ndodhur në Koorporatën Energjetike të Kosovës (KEK), ku një punëtor ka humbur jetën në vendin e punës.

Sipas të dhënave fillestare, aksidenti ka ndodhur gjatë angazhimit në transportin dhe zhvendosjen e kabllove 6kV, me ç’rast viktima dyshohet se ka rënë në kontakt me tensionin elektrik dhe ka pësuar lëndime të rënda”, thuhet në njoftimin e Prokurorisë Themelore në Prishtinë.

Po ashtu, në vendin e ngjarjes kanë dalë njësitet përkatëse të Policisë së Kosovës, Komisioni i Pavarur për miniera dhe minerale (KPMM), Inspektorati i Punës dhe Inspektorati i Brendshëm i Koorporatës Energjetike (KEK), ku me urdhër të Prokurorit kujdestar kanë ndërmarrë të gjitha veprimet e nevojshme hetimore për ndriçimin e plotë të rrethanave dhe shkaqeve që kanë çuar deri te humbja e jetës së punëtorit.

“Prokurori i çështjes, brenda afatit ligjor, do të shqyrtojë rrethanat dhe provat e grumbulluara si dhe do të ndërmarrë të gjitha veprimet e nevojshme, duke përfshirë edhe kërkesën për caktimin e ndonjërën prej masave të sigurisë ndaj të pandehurit në procedurë penale në përputhje me dispozitat ligjore në fuqi”, thuhet në njoftim.