Kosova i ndalon përgjithmonë hyrjen shefit të Telekomit të Serbisë

Prishtinë, 7 gusht 2026 18:34

Ministri i Punëve të Brendshme, Xhelal Sveçla, ka njoftuar se ka marrë vendim që shefi i Telekomit të Serbisë, Vladimir Luçiq, të shpallet person i padëshirueshëm (non grata) në Republikën e Kosovës, duke i ndaluar përgjithmonë hyrjen, qëndrimin dhe kalimin transit në territorin e vendit.

Sipas Sveçlës, vendimi është marrë pas deklaratave publike të Luçiqit, të cilat, sipas tij, bien ndesh me rendin kushtetues, sovranitetin dhe integritetin territorial të Republikës së Kosovës.

Ministri theksoi se askush nuk mund të hyjë në territorin e Kosovës dhe prej aty të veprojë apo të deklarohet kundër shtetësisë dhe autoritetit të institucioneve të saj. Ai shtoi se institucionet nuk do të tolerojnë promovimin apo mbështetjen e politikave që cenojnë sovranitetin e vendit.

Sveçla ritheksoi se Republika e Kosovës është shtet i pavarur dhe sovran, duke nënvizuar se institucionet do të vazhdojnë të mbrojnë me vendosmëri rendin kushtetues, sovranitetin dhe integritetin territorial të vendit.