As takimi i dytë nuk sjell marrëveshje mes Kurtit dhe Abdixhikut

Prishtinë, 5 gusht 2026 18:32

Takimi ndërmjet liderit të Lëvizjes Vetëvendosje, kryeministrit në detyrë Albin Kurti, dhe kryetarit të Lidhjes Demokratike të Kosovës, Lumir Abdixhiku, ka përfunduar sërish pa arritjen e një marrëveshjeje për formimin e institucioneve.

Takimi u zhvillua pas mbledhjes së Grupit Parlamentar të LDK-së dhe ishte i dyti brenda dy ditëve mes dy liderëve.

Pas përfundimit të takimit, Kurti deklaroi se nuk ka lajme, ërderisa s’ka marrëveshje.

“Po, kur ta realizojmë marrëveshjen, do të mund t’ju njoftojmë”, tha ai.

E pas mbledhjes së Grupit Parlamentar të LDK-së, Abdixhiku u pyet nga gazetarët nëse gjatë ditës pritet të zhvillohet një takim me Kurtin.

Ai tha se nuk ka asgjë të re përtej asaj që ka deklaruar në konferencën për media të mbajtur një natë më parë.

“Më lejoni pak kohë. Nuk ka asgjë tjetër”, deklaroi Abdixhiku.

Edhe takimi i së martës, që zgjati rreth tre orë, nuk solli marrëveshje politike për formimin e institucioneve.

Megjithatë, të dy palët kanë lënë të hapur mundësinë e vazhdimit të dialogut. Kurti ka theksuar se ekziston interesim për bashkëpunim me LDK-në për progres të përshpejtuar, ndërsa Abdixhiku ka ritheksuar qëndrimin e LDK-së se synon balancë institucionale.

Ndërkohë, Kuvendi i Kosovës ka njoftuar se seanca konstituive do të mbahet nesër në orën 10:00, në përpjekje për të avancuar procesin e krijimit të institucioneve të reja.