Edhe në rajonin e Ferizajt evidentohen SMS mashtruese, Policia: Mos klikoni në linke të dyshimta

Prishtinë, 5 gusht 2026 16:04

Policia e Kosovës ka njoftuar se edhe në rajonin e Ferizajt janë evidentuar raste të mesazheve (SMS) mashtruese, të cilat dërgohen në emër të Policisë së Kosovës, duke pretenduar në mënyrë të rreme se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesa.

Sipas njoftimit të Drejtorisë Rajonale të Policisë në Ferizaj, këto mesazhe nuk janë zyrtare dhe janë pjesë e tentativave për mashtrim.

“KËTO MESAZHE NUK JANË ZYRTARE DHE JANË PJESË E TENTATIVAVE PËR MASHTRIM”, thuhet në njoftimin e Policisë.

Policia u ka bërë thirrje qytetarëve që të mos klikojnë në linke të dyshimta, të mos japin të dhëna personale apo bankare dhe të mos kryejnë pagesa përmes lidhjeve të dërguara me SMS.

Në rast se pranojnë një mesazh të tillë, qytetarët këshillohen që ta fshijnë menjëherë, ta raportojnë rastin në Policinë e Kosovës, në stacionin më të afërt, si dhe të kontaktojnë bankën e tyre nëse kanë ndarë të dhëna personale ose bankare.

“Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192”, thuhet në njoftim.