Ruajtja e gjuhës shqipe në diasporë, mbi 200 mësimdhënës bëhen bashkë në seminarin e Gjuhës Shqipe

Prishtinë, 1 gusht 2026 09:24

Mbi 200 mësues të gjuhës shqipe dhe kulturës shqiptare nga diaspora kanë përmbyllur punimet e Seminarit XIX, i cili u mbajt në Kosovë nga 28 deri më 31 korrik, me synim forcimin e mësimdhënies së gjuhës amtare tek fëmijët shqiptarë që jetojnë jashtë vendit.

Seminari, i organizuar nga Ministria e Arsimit, Shkencës dhe Teknologjisë e Kosovës në bashkëpunim me Ministrinë e Arsimit të Shqipërisë, mblodhi mësimdhënës nga vende të ndryshme të botës për të shkëmbyer përvoja profesionale, praktika të suksesshme dhe metoda bashkëkohore të mësimdhënies.

Gjatë katër ditëve të aktivitetit u zhvilluan ligjërata, diskutime dhe prezantime që trajtuan sfidat e ruajtjes së gjuhës shqipe në diasporë, si dhe rëndësinë e bashkëpunimit ndërinstitucional për avancimin e mësimit plotësues në gjuhën amtare.

Organizatorët vlerësuan se seminari shërbeu si një platformë e rëndësishme për fuqizimin e rrjetit të mësuesve shqiptarë në mërgatë dhe për ruajtjen e identitetit gjuhësor e kulturor të brezave të rinj.

Në ceremoninë përmbyllëse u theksua se angazhimi i mësuesve të diasporës mbetet kyç në kultivimin e gjuhës, kulturës dhe traditës shqiptare te fëmijët që jetojnë jashtë trojeve shqiptare, ndërsa u shpreh gatishmëria që bashkëpunimi mes institucioneve të Kosovës, Shqipërisë dhe mësuesve në diasporë të vazhdojë edhe në vitet e ardhshme.