Pas identifikimit të tre viktimave të luftës, priten identifikime të tjera në ditët në vijim

Prishtinë, 4 nëntor 2026

Pas identifikimit të mbetjeve mortore të tre personave të zhdukur me dhunë gjatë luftës në Kosovë, institucionet përgjegjëse kanë paralajmëruar se në ditët në vijim priten identifikime të tjera.

Komisioni Qeveritar për Persona të Zhdukur ka njoftuar se, bazuar në raportet e reja të ADN-së dhe vlerësimin e antropologut mjekoligjor, janë identifikuar Adem (Fazli) Ademi, Fatmir (Bajram) Fazlija dhe Ali (Islam) Haliti, të cilët i përkasin rastit të njohur si “Grupi i Intelektualëve”.

Mbetjet mortore të tyre ishin zhvarrosur nga varret masive në Kalludër dhe Jabukë të Zubin Potokut.

Pas pranimit të raporteve nga Komisioni Ndërkombëtar për Persona të Zhdukur, Komisioni Qeveritar, së bashku me Institutin për Mjekësi Ligjore dhe Policinë e Kosovës – Drejtorinë për Hetimin e Krimeve të Luftës, ka zhvilluar takime me familjarët për t’i njoftuar zyrtarisht për identifikimet.

Këto tri identifikime vijnë disa javë pas konfirmimit të identitetit të Idriz Rrecajt, Adem Beqirit dhe Sali Mëziut, po ashtu pjesë e rastit “Grupi i Intelektualëve”.

Komisioni Qeveritar ka bërë të ditur se procesi i identifikimit do të vazhdojë dhe se në ditët në vijim priten rezultate të tjera, ndërsa familjet përkatëse do të njoftohen fillimisht, para se informacionet të bëhen publike.

Institucionet përgjegjëse kanë ritheksuar përkushtimin për zbardhjen e fatit dhe vendndodhjes së të gjithë personave të zhdukur me dhunë gjatë luftës në Kosovë.