Punimet në Parkun Industrial në Frashër avancojnë, shtohet interesi i bizneseve për investime

Prishtinë, 27 korrik 2026 19:08

Tre muaj pas nisjes së punimeve, ndërtimi i Parkut Industrial në fshatin Frashër të Mitrovicës po avancon me ritëm të mirë, ndërsa infrastruktura bazike është pranë përfundimit. Kjo u bë e ditur gjatë një vizite në terren nga ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, e shoqëruar nga zëvendësministrat Fatban Bunjaku dhe Jeton Mehmeti, si dhe kryetari i Komunës së Mitrovicës, Faton Peci.

Sipas njoftimit, gjatë vizitës u vlerësua ecuria e projektit dhe u theksua se tashmë ekziston interesim i madh i bizneseve për të investuar në parkun industrial.

Kusari-Lila tha se ministria mbetet e përkushtuar për krijimin e infrastrukturës moderne dhe kushteve të favorshme për investitorët vendorë e të huaj, me synim zhvillimin e aktivitetit ekonomik dhe rritjen e prodhimit në Kosovë.

Parku Industrial në Frashër do të ndërtohet në përputhje me standardet për mbrojtjen e mjedisit, ndërsa projekti synon të krijojë hapësirë të përshtatshme për zhvillimin e bizneseve dhe tërheqjen e investimeve të reja.

Ministrja njoftoi gjithashtu se, krahas funksionalizimit të këtij parku industrial, ministria po planifikon ndërtimin e një parku industrial edhe në komunat veriore të Kosovës, me qëllim zgjerimin e mundësive për investime, krijimin e vendeve të reja të punës dhe zhvillim më të balancuar ekonomik në të gjithë vendin.