Dëshmitari në rastin “Ibër-Lepenci”: 20 nga 24 mostrat përputheshin me ADN-në e të akuzuarit Viqentijeviq

Prishtinë, 27 korrik 2026 20:57

Në Gjykatën Themelore në Prishtinë ka vazhduar gjykimi ndaj Dragisha e Jovan Viqentijeviqit si dhe Igor Dimoviqit, të akuzuar për sulmin në kanalin e “Ibër-Lepencit”. Gjatë seancës u dëgjuan dëshmitë e drejtorit të Infrastrukturës në “Ibër-Lepenc”, Ernest Kërçeli, i cili tha se dëmet kapin vlerën e 375 mijë eurove, si dhe të ekspertit të ADN-së, Fatmir Ademi, sipas të cilit nga mostrat e analizuara, 20 lidhen me të akuzuarin Jovan Viqentijeviq.

Ernest Kërçeli, drejtor i Infrastrukturës në “Ibër-Lepenc” dhe Fatmir Ademi, ekspert i ADN-së në Agjencinë e Kosovës për Forenzikë dëshmuan të hënën ndaj tre të akuzuarve për sulmin ndaj kanalit të “Ibër-Lepencit”: Dragisha e Jovan Viqentijeviq dhe Igor Dimoviq.

Dëshmitari Kërçeli, që foli edhe si palë e dëmtuar, tha se dëmet nga sulmi i 2024-s në fshatin Varagë, arrijnë në 375 mijë euro.

Ai tha se dëmi ishte më i madh se që ishte menduar në fillim dhe se pasojat kanë mundur të jenë fatale nëse nuk do të intervenohej shpejt.

Në pyetjen e gjyqtarit Vesel Ismaili, se cilat do të ishin pasojat, dëshmitari ndër të tjera përmendi mundësinë e kolapsit të Korporatës Energjetike të Kosovës, ndërmarrje që furnizohet me ujë nga kanali i “Ibër-Lepencit”.

“Dëmet do të kishin qenë shumë të mëdha për qytetarët e Kosovës. Nuk do të kishte rrymë, nuk do të kishte linja telefonike. Qytetarët e Prishtinës që furnizohen nga Termokosi nuk do të kishin mundur të ngroheshin. Spitalet, QKUK-ja, nuk do të kishin energji, ngrohje dhe furnizim me ujë”, ka deklaruar dëshmitari Ernest Kërçeli, drejtor i Infrastrukturës në “Ibër-Lepenc”.

Gjatë seancës u dëgjua edhe dëshmitari tjetër, Fatmir Ademi, ekspert i ADN-së në Agjencinë e Kosovës për Forenzikë, i cili bëri ekzaminimin e 50 dëshmive të marra nga vendi i ngjarjes.

Sipas tij, 20 prej mostrave e lidhin të akuzuarin Jovan Viqentijeviq me ngjarjen e ndodhur.

“Sa u përket përputhjeve të personave me shifrat S1 dhe S2, ato janë paraqitur në raportet e ADN-së. Ajo që është me rëndësi është konkluzioni numër pesë, ku ndër dëshmitë e tjera kanë qenë edhe tri dëshmi nga vendi i ngjarjes me profile të përziera të ADN-së, të cilat i kemi kontrolluar në mënyrë manuale. Në dëshminë numër MR4, e përshkruar si fitil ndezës me gjatësi nëntë metra, gjatë kontrollimit manual kemi vërejtur shenjat e personit me shifrën S1, Jovan. Nga 24 shenja të S1, i kemi gjetur në 20 vende. Meqenëse nuk kemi pasur softuer për analizimin e këtyre profileve dhe nuk e kemi pasur të validuar metodën, i kemi sugjeruar hetuesisë që interpretimin e kësaj përzierjeje ta kërkojë jashtë vendit, në një shtet që e ka të validuar metodën”, ka thënë në dëshminë e tij Fatmir Ademi, ekspert i ADN-së në Agjencinë e Kosovës për Forenzikë.

Sipas Ademit, në mungesë të metodave për ekzaminim të mëtejshëm të mostrave, është rekomanduar që interpretimi i tyre të bëhet jashtë vendit.

Për këtë, prokurori Bekim Kodraliu njoftoi se është përpiluar raport edhe nga një laborator në Romë, i cili, sipas dëshmitarit Ademi, nuk ka gjetur kundërthënie me raportin e Agjencisë së Kosovës për Forenzikë, por vetëm i ka konfirmuar gjetjet.

Me kërkesë të palës mbrojtëse, seanca u ndërpre për të vazhduar një ditë më pas në orën 13:30. Sipas avokatëve të të akuzuarve, dëshmitari Ademi është i rëndësishëm për ta dhe se nuk ishin të përgatitur për të vazhduar me pyetje”.

Prokuroria Speciale i akuzon që të tre të pandehurit për armëmbajtje pa leje. E dy vëllezërit Viqentijeviq edhe për veprat penale të “rrezikimit të rendit kushtetues me shkatërrimin apo dëmtimin e instalimeve dhe pajisjeve publike, “kryerjes së veprës terroriste” dhe “spiunazhit”.