Kurti: Gjenocidi në Srebrenicë është e vërtetë historike, juridike dhe njerëzore

Prishtinë, 11 korrik 2026 09:12

Kryeministri në detyrë i Kosovës, Albin Kurti, ka bërë thirrje që gjenocidi në Srebrenicë të mos harrohet dhe të mos relativizohet, duke theksuar se pranimi i së vërtetës është kusht për drejtësi dhe paqe të qëndrueshme.

Në akademinë përkujtimore të mbajtur në Institutin e Historisë në Prishtinë, me rastin e 31-vjetorit të gjenocidit në Srebrenicë, Kurti tha se masakra e 11 korrikut 1995 është një e vërtetë historike, juridike dhe njerëzore e vërtetuar nga drejtësia ndërkombëtare.

Ai theksoi se gjenocidi ishte rezultat i një politike të spastrimit etnik dhe paralajmëroi se krime të tilla nuk fillojnë me armë, por me propagandë, gjuhë të urrejtjes dhe mohimin e tjetrit.

Sipas Kurtit, mohimi i gjenocidit nuk është çështje interpretimi politik, por sulm ndaj fakteve, drejtësisë dhe mundësisë për paqe. Ai shtoi se relativizimi i krimeve krijon terren për përsëritjen e tyre.

Kryeministri në detyrë deklaroi se Serbia duhet të përballet me të kaluarën dhe të distancohet qartë nga ideologjia që, sipas tij, mundësoi gjenocidin, duke theksuar se pranimi i së vërtetës dhe pendimi janë elemente të domosdoshme për ndërtimin e marrëdhënieve të qëndrueshme në rajon.

Duke folur për Kosovën, Kurti tha se qytetarët e saj e njohin dhimbjen e spastrimit etnik, varrezave masive dhe personave të zhdukur me dhunë, prandaj solidariteti me popullin boshnjak është, sipas tij, i natyrshëm dhe buron nga përvoja e përbashkët.

Në fund të fjalës së tij, ai u bëri homazhe viktimave të Srebrenicës, familjeve të tyre dhe popullit boshnjak, duke theksuar se kujtesa për Srebrenicën duhet të mbetet një thirrje e përhershme për drejtësi, dinjitet dhe mbrojtjen e lirisë.