Punime në aksin Prevallë–Shtërpcë, përmirësohet qasja në zonën turistike

Prishtinë, 10 korrik 2026 20:16

Punimet për sanimin e segmentit të dëmtuar të rrugës rajonale R115, nga Prevalla në drejtim të Shtërpcës, kanë nisur nga Ministria e Infrastrukturës dhe Transportit.

Ndërhyrja vjen në kulmin e sezonit veror, kur Prevalla mirëpret një numër të madh vizitorësh nga Kosova dhe jashtë saj.

Si një nga destinacionet më të njohura turistike të vendit, kjo zonë ka qarkullim të shtuar të automjeteve gjatë gjithë vitit, veçanërisht në fundjavë dhe gjatë sezonit të pushimeve.

Sipas ministrisë, segmenti kishte pësuar dëmtime, ndërsa sanimi i tij pritet të rrisë sigurinë në komunikacion dhe të lehtësojë qarkullimin për banorët, turistët dhe të gjithë qytetarët që frekuentojnë këtë aks rrugor.

Përfundimi i punimeve do të përmirësojë qasjen drejt Prevallës, duke krijuar kushte më të mira për zhvillimin e turizmit dhe lëvizjen e sigurt në këtë zonë malore.