Aeroporti i Prishtinës hiqet nga lista si pjesë e Serbisë pas ndërhyrjes diplomatike, vendoset edhe flamuri i Kosovës

Prishtinë, 10 korrik 2026 11:48

Një reagim i qytetarëve të Kosovës, i mbështetur nga angazhimi diplomatik i Ambasadës së Kosovës në Gjermani, ka çuar në korrigjimin e një pasaktësie në platformën gjermane të fluturimeve “Flights Frankfurt”, ku Aeroporti Ndërkombëtar i Prishtinës “Adem Jashari” ishte paraqitur gabimisht si pjesë e Serbisë.

Lajmin e bëri të ditur ambasadori i Kosovës në Gjermani, Faruk Ajeti, i cili theksoi se ky rast dëshmon se bashkëpunimi ndërmjet qytetarëve dhe diplomacisë mund të sjellë rezultate konkrete në mbrojtjen e identitetit shtetëror të Kosovës në arenën ndërkombëtare, përcjell VeritasInfo.

Sipas tij, korrigjimi i këtij gabimi është një tjetër shembull i rëndësisë së reagimit të shpejtë ndaj paraqitjeve të pasakta të Republikës së Kosovës në platforma dhe institucione të huaja.

Ambasadori Ajeti u bëri thirrje bashkatdhetarëve dhe qytetarëve që jetojnë në Gjermani të raportojnë çdo rast kur Kosova ose qytetet e saj paraqiten në mënyrë të pasaktë nga institucione apo kompani gjermane.

Ai kërkoi që këto raste të dërgohen në adresën elektronike të Ambasadës së Kosovës në Gjermani, të shoqëruara me dëshmi, në mënyrë që të ndërmerren hapat diplomatikë për korrigjimin e tyre.

Ambasada e Kosovës në Gjermani vlerësoi se angazhimi i përbashkët i qytetarëve dhe institucioneve mbetet kyç për promovimin dhe mbrojtjen e imazhit të Republikës së Kosovës në nivel ndërkombëtar.