Hapet për qarkullim kyçja në Mazgit, përfundojnë punimet e asfaltimit

Prishtinë, 3 korrik 2026 14:25

Ministria e Infrastrukturës dhe Transportit ka njoftuar se është lëshuar për qarkullim kyçja në Mazgit, pasi kanë përfunduar punimet e asfaltimit të këtij segmenti rrugor.

Sipas ministrisë, ndërhyrja është realizuar si masë e përkohshme me qëllim të përmirësimit të kushteve të qarkullimit dhe rritjes së sigurisë për pjesëmarrësit në trafik.

Autoritetet bëjnë të ditur se kjo zgjidhje do të mbetet në fuqi deri në përfundimin e analizave teknike, të cilat pritet të përcaktojnë zgjidhjen afatgjatë për problemin e ujërave nëntokësore që po dëmtojnë trupin e rrugës në këtë pjesë.

Ministria ka njoftuar gjithashtu se gjatë ditëve në vijim do të përfundojë edhe vendosja e sinjalizimit horizontal, duke kompletuar kështu punimet e planifikuara për këtë fazë të projektit.

Në fund të njoftimit, ministria ka falënderuar qytetarët për durimin dhe mirëkuptimin e treguar gjatë kohës së zhvillimit të punimeve.