Revolta qytetare në Serbi, rritet presioni ndaj regjimit serb

Prishtinë, 24 maj 2026 08:09

Dhjetëra mijëra studentë dhe qytetarë kanë mbushur sheshin Slavija në zemër të Beogradit, në një protestë masive kundër regjimit serb dhe politikave të pushtetit aktual. Pamjet ajrore tregojnë një numër të madh protestuesish që kanë bllokuar tërësisht sheshin dhe bulevardet përreth, duke e kthyer qendrën e kryeqytetit serb në epiqendrën e pakënaqësisë qytetare.

Protestuesit kanë kërkuar zgjedhje të parakohshme, duke akuzuar pushtetin për korrupsion, kontroll të institucioneve dhe shtypje të zërit kritik. Studentët, të cilët po konsiderohen si organizatorët kryesorë të mobilizimit, kanë bërë thirrje për ndryshim politik dhe largimin e regjimit aktual nga pushteti.

Në mesin e turmës janë parë pankarta me mesazhe për demokraci, drejtësi dhe liri, ndërsa brohoritjet kundër qeverisë kanë dominuar atmosferën gjatë gjithë protestës. Tubimi është cilësuar nga pjesëmarrësit si një nga protestat më të mëdha qytetare në Serbi në vitet e fundit.

Protesta në Slavija vjen në një kohë tensionesh të shtuara politike në Serbi, ku opozita dhe grupet qytetare po rrisin presionin ndaj pushtetit për reforma demokratike dhe mbajtjen e zgjedhjeve të reja.

Mediat kanë raportuar për pjesëmarrje mbi 100 mijë protestues, duke e konsideruar ndër protestat më të mëdha që nisën si shenjë pakënaqësie ndaj korrupsionit, krimit të organizuar të regjimit shtetëror.

Është raportuar edhe për përplasje fizike ndërmjet protestuesve dhe forcave policore.