Protesta të reja në Serbi, studentët ngrejnë zërin kundër pushtetit dhe korrupsionit

Prishtinë, 23 maj 2026 20:57

Studentët në bllokadë në Serbi kanë mbajtur sonte një protestë të madhe në sheshin “Slavija” në Beograd, pas një periudhe më të qetë të mobilizimeve qytetare kundër pushtetit.

Protesta është zhvilluar në një atmosferë të tensionuar politike, pas incidenteve të fundit mes mbështetësve të pushtetit dhe studentëve protestues. Gjatë një aksioni promovues në sheshin “Slavija”, janë raportuar përplasje verbale mes studentëve dhe simpatizantëve të Partisë Përparimtare Serbe (SNS), ndërsa analistë dhe aktivistë kanë paralajmëruar mundësi për provokime.

Përfaqësues të shoqërisë civile kanë deklaruar se protesta është fokusuar në çështjet që lidhen me përgjegjësinë institucionale, korrupsionin dhe raportin e pushtetit me qytetarët. Aktivisti Balsha Bozhoviq ka vlerësuar se studentët duhet të mbajnë fokusin te problemet reale sociale dhe politike në Serbi, duke shmangur temat që mund të devijojnë vëmendjen nga kërkesat kryesore të protestës.

Ndërkohë, mediat serbe raportojnë se interesimi për protestën është i madh dhe se qytetarë nga pjesë të ndryshme të Serbisë i janë bashkuar studentëve në Beograd. Për organizimin e pjesëmarrësve janë siguruar edhe rrjete për transport dhe akomodim, megjithëse organizatorët kanë njoftuar për probleme teknike në koordinimin online të qytetarëve që duan të marrin pjesë në protestë.

Kjo protestë konsiderohet si një nga mobilizimet më të mëdha të paralajmëruara nga lëvizja studentore në muajt e fundit, ndërsa organizatorët kanë përdorur sloganin “Ti dhe unë, Slavija”, duke bërë thirrje për pjesëmarrje masive qytetare.