Avokati i Thaçit kritikon Specialen: 40 ankesa, asnjë e pranuar në pesë vite e gjysmë

Prishtinë, 18 maj 2026 21:22

Avokati i ish-presidentit të Kosovës, Hashim Thaçi, Luka Mishetić, ka kritikuar mënyrën e trajtimit të ankesave nga Gjykata e Apelit në kuadër të Dhomave të Specializuara të Kosovës.

Përmes një postimi në platformën X, Mishetić ka thënë se mbrojtja e Hashim Thaçi ka paraqitur gjithsej 40 ankesa ndërmjetëse gjatë procesit gjyqësor, por sipas tij, të gjitha janë refuzuar nga Paneli i Apelit.

Sipas tij, kjo do të thotë se bilanci i ankesave në rastin e Thaçit është “0 nga 40” gjatë pesë viteve e gjysmë të procesit.

“Për hir të plotësisë lidhur me efektivitetin e ankesave në gjyqin për krime lufte ndaj Hashim Thaçi: Mbrojtja në këtë gjykim tashmë ka paraqitur (dhe përfunduar) 40 ankesa ndërmjetëse. Paneli i Apelit deri më tani i ka refuzuar të gjitha. Kjo do të thotë 0 nga 40 përgjatë pesë viteve e gjysmë”, ka shkruar ai.

Procesi gjyqësor ndaj Hashim Thaçi, Kadri Veseli, Jakup Krasniqi dhe Rexhep Selimi ka nisur më 3 prill 2023, ndërsa vendimi përfundimtar pritet të shpallet më 20 korrik 2026.

Ndërkohë, Zyra e Prokurorit të Specializuar ka kërkuar dënime deri në 45 vjet burgim për secilin prej të akuzuarve, kërkesë që është kundërshtuar nga mbrojtja e tyre.