Gërvalla: Funksionimi i gjykatave dhe ecuria e lëndëve mbeten treguesit më realë të gjendjes së sistemit gjyqësor

Prishtinë 18 Maj 2026 17:16

Kështu ka deklaruar Ministrja në Detyrë e Drejtësisë, Donika Gërvalla pas vizitës që ka zhvilluar në Gjykatën Themelore në Ferizaj.

Sipas Gërvallës, pavarësia e gjyqësorit dhe përgjegjësia në ushtrimin e detyrës duhet të ecin paralelisht.

Postimi i plotë:

Funksionimi i gjykatave dhe ecuria e lëndëve mbeten treguesit më realë të gjendjes së sistemit gjyqësor. Nuk janë deklaratat, por ritmi i trajtimit të rasteve dhe mënyra e menaxhimit të ngarkesës që përcaktojnë besueshmërinë e sistemit në sytë e qytetarëve.

Në vazhdën e angazhimit në terren dhe vizitave në institucionet e drejtësisë në nivel lokal, vizitova Gjykatën Themelore në Ferizaj, ku takova kryetarin e gjykatës, z. Mustafë Tahiri. Biseduam për funksionimin praktik të gjykatës, ngarkesën e lëndëve dhe sfidat në administrimin e drejtësisë në nivel të parë. Ndër të tjera, vlerësuam edhe rolin e Gjykatës Administrative dy javë pas funksionalizimit të saj, në lehtësimin e ngarkesës dhe rritjen e efikasitetit të sistemit në tërësi.

Reforma në drejtësi mbetet proces i vazhdueshëm me synim përmirësimin e funksionimit të institucioneve dhe rritjen e efikasitetit në të gjitha hallkat e sistemit, si pjesë e forcimit të sundimit të ligjit.

Pavarësia e gjyqësorit dhe përgjegjësia në ushtrimin e detyrës duhet të ecin paralelisht, si kushte thelbësore për thellimin e besimit të qytetarëve në drejtësi.