Kadetët e FSK-së marrin pjesë në forum ndërkombëtar për të Drejtën Humanitare në Itali

Prishtinë 14 Maj 2026 14:00

Forca e Sigurisë së Kosovës ka bërë të ditur se Qendra për Studime Universitare e saj ka marrë pjesë për herë të dytë në forumin ndërkombëtar “International Humanitarian Law”, i cili u mbajt në Itali.

Sipas njoftimit, aktiviteti ka mbledhur kadetë nga akademi të ndryshme ushtarake të botës me qëllim shkëmbimin e njohurive dhe përvojave në fushën e së Drejtës Ndërkombëtare Humanitare.

“Ky aktivitet ndërkombëtar mbledh kadetë nga akademi ushtarake të ndryshme të botës për të shkëmbyer njohuritë dhe aftësitë e tyre në të Drejtën Ndërkombëtare Humanitare”, njofton FSK.

Nga Qendra për Studime Universitare është theksuar se përkushtimi për mbështetjen e kadetëve do të vazhdojë edhe në të ardhmen, me synimin që ata të jenë pjesë e iniciativave ndërkombëtare që ndikojnë në avancimin profesional dhe përfaqësimin dinjitoz të FSK-së.