Profesionalizëm dhe gatishmëri, Policia e Kosovës trajnon njësitë për reagim ndaj situatave me turma

Prishtinë, 12 maj 2026 18:58

Policia e Kosovës po vazhdon të dëshmojë përkushtim të lartë në ngritjen profesionale dhe avancimin e kapaciteteve operative të zyrtarëve të saj. Në këtë kuadër, në Kampin e Njësive Speciale në Vrellë është mbajtur ceremonia e certifikimit për 36 zyrtarë policorë të Njësive për Reagim të Shpejtë, të cilët kanë përfunduar me sukses trajnimin dyjavor në fushën e “Ballafaqimit me Turma”.

Trajnimi është realizuar nga instruktorët e Drejtorisë së Njësisë Speciale Operative, përmes Divizionit të Trajnimeve në kuadër të Departamentit të Burimeve Njerëzore, duke reflektuar nivelin e lartë të profesionalizmit dhe përgatitjes që po ndërton vazhdimisht Policia e Kosovës.

Programi trajnimor është fokusuar në menaxhimin e situatave me turma dhe tubime publike, me qëllim forcimin e aftësive taktike dhe operative të pjesëtarëve policorë për reagim efikas dhe profesional në çdo situatë sfiduese, ka njoftuar Policia e Kosovës, përcjell Veritasinfo.

Ky trajnim është pjesë e ciklit të planifikuar për të tetë rajonet policore të vendit, në përputhje me Konceptin Nacional për Menaxhimin e Trazirave Qytetare, duke dëshmuar seriozitetin institucional të Policisë së Kosovës në ruajtjen e rendit, sigurisë publike dhe ofrimin e shërbimeve profesionale për qytetarët.