Serbia ‘shënjestron’ policët që arrestuan Popoviqin

Prishtinë, 22 Korrik 2025

Pas arrestimit të ndihmësdrejtorit të së ashtuquajturës Zyrë për Kosovën, Igor Popoviq, Beogradi zyrtarë iu ka dhënë urdhër strukturave inteligjente dhe atyre të sigurisë për të ‘shënjestruar’ pjesëtarë të Policisë së Kosovës.

Zyra e Prokurorit Publik ka urdhëruar që të mblidhen informacione për ata që e arrestuan Popoviqin.

“Zyra e Prokurorit të Lartë Publik në Beograd iu ka dërguar kërkesa për mbledhje të informacionit të nevojshëm Drejtorisë së Policisë Kriminale pranë Ministrisë së Punëve të Brendshme dhe Agjencisë së Sigurisë dhe Informacionit me qëllim të identifikimit të personave të cilët, më 18 korrik 2025, duke u paraqitur si e ashtuquajtura ‘Polici e Kosovës’, e arrestuan dhe e dërguan në Prishtinë ndihmësdrejtorin e Zyrës për Kosovën, Igor Popoviq”, thuhet në njoftim e Prokurorisë së Lartë Publike në Beograd.

Kërkesa, siç thuhet, është bërë me qëllim që të sqarohen elementet thelbësore për veprën penale të kidnapimit sipas nenit 134, paragrafit 3, bashkë me paragrafin 1, nga Kodi Penal.

Gjykata Themelore e Prishtinës të dielën ia ka caktuar masën e paraburgimit prej një muaji Igor Popoviqit.  Masa i është caktuar me kërkesë të prokurorisë, me arsyetimin se ka kryer veprën penale “Nxitje e përçarjes dhe mosdurimit”.

Popoviq, dyshohet se më 18 korrik në fshatin Hoçë të Madhe të Rahovecit, gjatë një fjalimi me serbët lokalë, e ka quajtur UÇK-në organizatë terroriste, ndërkohë e ka akuzuar edhe bashkësinë ndërkombëtare për siç ka thënë, heshtje ndaj autorëve të krimeve ndaj serbëve. Arrestimi i tij është bërë po atë ditë, në pikën kufitare me Serbinë, Bërnjak.