Kosova dhe Turqia thellojnë partneritetin ushtarak me marrëveshje financiare

Prishtinë, 5 maj 2026 19:58

Ministri i Mbrojtjes i Kosovës, Ejup Maqedonci, ka njoftuar për nënshkrimin e një marrëveshjeje të rëndësishme me Turqinë, e cila synon forcimin e kapaciteteve ushtarake të vendit.

Sipas tij, marrëveshja është nënshkruar së bashku me Ministrin e Mbrojtjes Kombëtare të Turqisë, Yaşar Güler, dhe përbën një hap konkret në thellimin e bashkëpunimit strategjik ndërmjet dy shteteve.

“Marrëveshja e Bashkëpunimit Financiar Ushtarak ndërmjet Qeverisë së Republikës së Kosovës dhe Qeverisë së Republikës së Turqisë është dëshmi e qartë e partneritetit tonë strategjik dhe e gatishmërisë për ta avancuar këtë bashkëpunim në mënyrë afatgjate”, ka deklaruar Maqedonci.

Në kuadër të kësaj marrëveshjeje, Qeveria turke do të ofrojë mbështetje financiare në vlerë prej 200 milionë lirash turke, mjete këto që do të përdoren për fuqizimin e kapaciteteve të Forcës së Sigurisë së Kosovës dhe zhvillimin e saj institucional e profesional.

Ministri theksoi se ky bashkëpunim reflekton nivelin e lartë të marrëdhënieve ndërmjet Kosovës dhe Turqisë, si dhe vullnetin e përbashkët për të kontribuar në paqe dhe stabilitet në rajon.