Sot do të dalë para Gjykatës polici i dyshuar për spiunazh, Bojan Jevtiq

Prishtinë 18 korrik 2025

Bojan Jevtiq, shefi i operativës në pikën kufitare “Dheu i Bardhë’ sot do të dalë para gjyqtarit të procedurës paraprake, pasi Prokuroria Speciale do të dorëzojë edhe kërkesën për caktimin e masës së sigurisë.

Jevtiq u arrestua në një aksion i cili u zhvillua më 17.07.2025, mes Prokurorisë Speciale, Inspektoratit Policor të Kosovës dhe Agjencisë Kosovare për Inteligjencë. Togeri po dyshohet si spiun i autoriteteve serbe, deri sa përdorte autoritetin e shefit të operativës policore në pikë kufitare, aty ku ishte i vendosur.

Në bazë të një hetimi gati një vjeçar, IPK arriti që të bëjë planin dhe të arrestojë togerin policor nën dyshimet për spiunazh.

Hetimet e zhvilluara në bashkëpunim me Inspektoratin Policor dhe Agjencinë e Kosovës për Intelegjencë kanë rezultuar me ndalimin dhe arrestimin e të pandehurit për 48 orë.

Inspektorati Policor i Kosovës ka rekomanduar edhe suspendimin e togerit policor i cili ka qenë i angazhuar në pozitën e shefit të operativës në policinë kufitare në pikë kalimin kufitar “ Dheu i Bardhë”.