Kurti: 500 mijë euro shpërblim për fitore ndaj Sllovakisë, 1 milion për kualifikim në Botëror

Prishtinë 26 Mars 2026 14:39

Kryeministri i Kosovës, Albin Kurti e kishte bërë një zotim të fuqishëm në pjesën e dytë të vitit 2025.

Gjatë njërës prej mbledhjeve të qeverisë së tij, Kurti kishte premtuar shpërblime të majme për futbollistët e Kombëtares së Kosovës në rast të vazhdimit të suksesit.

Më saktësisht, kreu i ekzekutivit i kishte premtuar 250 mijë euro për kalimin e grupeve, të cilin veçse e kishin bërë “dardanët”.

Ndërsa, premtimet e tij kishin vazhduar për suksesin eventual të Verdhekaltërve në të ardhmen.

Ai më 27 nëntor 2025 kishte premtuar premi, si për fitoren ndaj Sllovakisë ashtu edhe për një kualifikim eventual në Botërorin 2026, i cili gjatë verës që po vjen do të mbahet në Shtetet e Bashkuara të Amerikës, në Kanada dhe në Meksikë.

“Në fazën e radhës hyjmë me plot vetëbesim, besimin tonë në ta po e shprehim me zotimin tonë për ta. Së pari në rast të fitores ndaj Sllovakisë, zotohemi për shpërblim në vlerë prej 500 mijë eurosh”, thoshte Kurti, transmeton “Gazeta Express”..

“Dhe së dyti, në rast të kualifikimit në Kupën e Botës, zotohemi edhe për 1 milion euro shpërblim. Përpara Kosovë, gjithmonë me ty”, kishte shtuar ndër të tjera kryeministri.

Kosova do të luajë sonte me Sllovakinë në Bratisllavë në ndeshjen që do të nisë prej orës 20:45.

Në rast të një fitoreje eventuale në kryeqytetin sllovak, Dardanët do të luajnë të martën tjetër në stadiumin “Fadil Vokrri” në Prishtinë në finale me fituesin e duelit tjetër gjysmëfinal, Turqi – Rumani.

Kosova nuk ka qenë kurrë më afër kualifikimit në Kampionat Botëror, e sheh veten veç dy ndeshje larg tij