37 vjet nga demonstratat kundër suprimimit të autonomisë së Kosovës

Prishtinë 23 Mars 2026 8:09

Janë bërë 37 vjet nga demonstratat kundër suprimimit të autonomisë së Kosovës.

Më 23 mars 1989, në Kuvendin e Kosovës, u ndryshua Kushtetuta e vitit 1974 dhe u suprimua autonomia e Kosovës në kuadër të ish-Federatës jugosllave, duke e lënë atë nën administrimin e Serbisë.

Parlamenti i Kosovës ishte i rrethuar me tanke dhe forca ushtarake, dhe nën një shtetrrethim të ashpër, Serbia dhunshëm ia hoqi Kosovës autonominë.

Nga 190 delegatët e pranishëm në Kuvend, disa prej tyre, edhe pse nën presionin e shtetrrethimit të hekurt, votuan kundër këtij suprimimi, në mbrojtje të pozitës kushtetuese të Kosovës.

Para 23 marsit 1989, muaji shkurt i po atij viti u karakterizua nga greva e minatorëve të gjigantit “Trepça”, në mbrojtje të pozitës kushtetuese të Kosovës.

Në demonstratat kundër suprimimit të autonomisë, me kërkesa për krijimin e Republikës së Kosovës, ranë rreth 30 dëshmorë, qindra u plagosën dhe qindra të tjerë u arrestuan e u dënuan me burg.

E gjithë fushata kundër Kosovës kishte nisur më herët, në vitin 1987, nga qarqet politike serbe në Fushë Kosovë. Kjo periudhë njihet edhe si fillimi i lëvizjes serbe antishqiptare dhe shënon ngritjen në pushtet të Sllobodan Millosheviqit.