Prishtinë 18 Mars 2026 8:48
Kuvendi Komunal i Mitrovicës së Veriut miratoi më 17.03.2026 ndryshimet dhe plotësimet në rregulloren për shfrytëzimin e Palestrës Sportive.
Me këtë rregullore përcaktohet mënyra dhe kushtet e përdorimit të Palestrës Sportive si aktivitete me interes publik dhe për nevojat e komunës, programe edukative për fëmijë, ngjarje të ndryshme kulturore e aktivitete rekreative.
Me 12 vota pro, 1 kundër dhe 1 abstenim u miratua kjo rregullore.
Kryetari i Kuvendit Komunal, Ivan Zaporozhac, potencoi se vendimi i vitit 2023 i marrë nga ish- kuvendi do të zbatohet, por është konstatuar nevoja për ndryshime dhe plotësime të rregullores.
“Vendimi i vitit 2023 do të zbatohet rregullisht edhe në vitin 2026, në përputhje me mënyrën dhe suksesin e përdorimit të Këshillit të Sportit. Pas konsultimeve me ekipin juridik dhe drejtorin për sport dhe rini, është konstatuar se është e nevojshme të merret vendim për ndryshimin dhe plotësimin e kësaj rregulloreje”- theksoi Zaporozhac.
Nënkryetarja e Komunës, Adrijana Hoxhiq, listoi qëllimet për të cilat do të përdoret Palestra.
“Ndryshimet kanë për qëllim që salla e kuvendit të vihet më shumë në funksion të fëmijëve dhe të rinjve, si dhe që gjithçka të bëhet e qasshme për qytetarët në përputhje me parimin e interesit publik”- tha Hoxhiq.
Kundërshtime për ndryshim të rregullores kishte Aida Ferati-Doli, zëvendëskryesuese e Kuvendit Komunal.
“Është shumë i cekët dhe shumë i mangët për dallim nga rregullorja tjetër e cila ka qenë e votuar vitin e kaluar. Rregullorja paraprake ka qenë në përputhje me ligjet e me oraret”- tha ajo.
Krejtësisht kundër u shpreh Sinisha Llaziq, asamblist nga Lista Serbe, i cili tha se në të kaluarën Palestra nuk u shfrytëzua nga të rinjtë.
“Askush tre vite nuk ka hyrë në Palestrën Sportive. Jam i lumtur që kryetari e nëkryetarja kanë marrë vendim për shfrytëzim të Palestrës. Palestra ka qenë me pluhur, e papastër ku disa punëtorë kanë luajtur aty. Rinia nuk e kanë shfrytëzuar atë palestër, kanë luajtur në rrugë. E dimë çka sjell dimri e vera dhe duhet ta kemi këtë objekt”- potencoi Llaziq.
Te pika “të ndryshme” u diskutua problemi me mbeturina, punësimet, e sfida me qentë endacakë.
Kujtojmë se tentimin e disa personave në Mitrovicë të Veriut për largimin e ulëseve me ngjyrat që simbolizojnë qytetin e Mitrovicës dhe vendosjen e atyre me ngjyrat e flamurit të Serbisë në Palestrën e Sporteve e kishte ndaluar Policia e Kosovës pasditën e 16 dhjetorit 2025.
KALLXO.com po qëndronte jashtë objektit pasi që nuk ishte lejuar nga forcat e rendit të merrte pamje nga brenda.
Gjithsesi, në pamjet që kishte siguruar KALLXO.com shiheshin karriget e kaltra që u tentuan të vendoseshin e brenda po qëndronte zyrtari i Listës Serbe, Igor Simiq.
Në një përgjigje për KALLXO.com, Veton Elshani, zëvendësdrejtor i Drejtorisë Rajonale Mitrovicë-Veri, kishte thënë se Policia ka pranuar informacion se po zhvillohen punime në sallën e sporteve.
“Ne kemi shkuar aty për t’u njoftuar me situatën dhe çdo gjë është sqaruar dhe nuk ka ndonjë problem për ta theksuar”- kishte thënë Elshani
Shtrirje e institucioneve të Kosovës në veri, Kompania e Ujësjellësit “Mitrovica” vendoset në Leposaviq bashkë me flamurin e Republikës 
Mitrovica mbështet 47 klube sportive me mbi 176 mijë euro subvencione 
Rreth 90% e sipërfaqeve të mbjella u dëmtuan nga breshëri i fuqishëm që goditi dje Istogun 
MAPL nuk lejon realizimin e muralit të ish-Patriarkut serb, Pavle, në hapësirën publike në Mitrovicë të Veriut 
Podujeva me zonë të re ekonomike, nënshkruhet marrëveshja për Parkun e Përgjithshëm, me mbi 3 milionë euro investim 
Fillon nënshkrimi i peticionit `për një Ferizaj pa Uroshevac` 
Biserko: Zbulimi i varrezave të reja masive hap çështjen e përgjegjësisë së Serbisë për krimet në Kosovë 
Hapja e konsullatës serbe në Shkodër, banorët në protestë: I kemi të freskëta plagët, kemi vuajtur shumë 
Asllani drejt Premier Ligës, kërkohet nga Hull City 
Treni godet për vdekje një person në Pejë