Ura në Graçanicë për 48,966 euro. Oferta është pothuajse identike me buxhetin e planifikuar nga Lista Serbe

Graçanicë, 17 tetor 2026, 15:35

Kontrata për ndërtimin dhe rindërtimin e urave iu dha një konsorciumi në të cilin është edhe komopania “DINO”, ndërsa ndryshimi në çmimet e ofertave dhe shuma e parashikuar për projektin ngre pyetje në lidhje me kriteret e vendimmarrjes.

Komuna e Graçanicës, e kryesuar nga Lista Serbe, i dha kontratën për ndërtimin dhe rindërtimin e urave në fshatrat Gushtericë e Ulët dhe e Epërme, Dobrotin, Preoc dhe Llapnasellë një konsorciumi të përbërë nga N.T.SH. DINO dhe STRONG CONSTRUCTION, me vlerë totale prej 48,966.85 eurosh, thuhet në njoftimin e vendimit të autoritetit kontraktues të datës 7 tetor 2026.

Megjithatë, të dhënat nga dokumenti i publikuar ngrenë pyetje që meritojnë shqyrtim të mëtejshëm, veçanërisht kur bëhet fjalë për diferencën midis çmimeve të ofruara dhe shumës për të cilën u dha përfundimisht kontrata. Sipas dokumentit, ofertuesi i dytë, një konsorcium i LB Beton Group dhe NB Company, paraqiti një ofertë me vlerë 37,898.50 euro. Kjo është 11,068.35 euro më pak se oferta e konsorciumit të cilit iu dha kontrata. Në të njëjtën kohë, vlera e kontratës së zgjedhur përkon pothuajse plotësisht me shumën prej 48,970 eurosh, e cila, sipas deklaratave që shoqërojnë këtë rast, përmendet si buxheti i parashikuar për projektin.

Diferenca midis kësaj shume dhe çmimit të kontraktuar është vetëm 3.15 euro. Pyetja kryesore është pse kontrata iu dha konsorciumit me një çmim më të lartë, ndërsa oferta e konsorciumit tjetër ishte më e ulët me më shumë se 11,000 euro.