Kryeprokurorja West akuzon Thaçin dhe të tjerët për përpjekje për të “minuar” Gjykatën Speciale

Prishtinë 27 Shkurt 2026 12:07

Kryeprokurorja e Zyrës së Prokurorit të Specializuar, Kimberly West, nisi fjalën hyrëse duke akuzuar ish-presidentin Hashim Thaçi dhe katër të akuzuar të tjerë për përpjekje për të “minuar” funksionimin e Gjykatës Speciale në Hagë.

“Ata në mënyrë të drejtpërdrejtë kanë shkelur vendimet gjyqësore që kishin për synim që dëshmitarët dhe viktimat të japin dëshmi pa pasur frikë dhe që të kenë besimin se do t’u ruhej identiteti,” tha West.

Prokurorja shtoi se, “Thaçi akuzohet se në mënyrë të vazhdueshme ka ndërhyrë në dëshmitë e dëshmitarëve dhe ka shkelur të gjitha rregullat e gjykatës për mbrojtjen e informacionit konfidencial. Të bashkëakuzuarit kanë marrë pjesë në këto krime.”

West theksoi se veprimet e të akuzuarve përbëjnë thelbin e arsyeve pse është krijuar Gjykata Speciale.

“Krijimi i kësaj gjykate nuk kishte të bënte thjesht për krime lufte dhe krime kundër njerëzimit, por përfshinte në mënyrë specifike krimet e përfshira në këtë çështje gjyqësore,” tha ajo.

Ajo i përshkroi të akuzuarit si pjesë e një grupi “të vogël në Kosovë që vendosin interesin e tyre mbi të tjerët”, duke shtuar: “Nëse të akuzuarit kanë pasur sukses në ndikimin e dëshmitarëve, nuk ka rëndësi.”

West theksoi se çështja lidhet me audio-incizime të bisedave mes Thaçit dhe të akuzuarve të tjerë, si dhe dokumenteve të shkëmbyera mes tyre.

“Thaçi ka komunikuar me avokatët e tij, por asnjë nga këto biseda nuk është incizuar,” tha West, duke shtuar se të vetmet incizime janë të lidhura me biseda të paprivilegjuara.