Sekuestrohen armë zjarri në Zubin Potok, arrestohen dy persona

Mitrovicë, 2 nëntor 2026 06:53

Katër armë zjarri janë sekuestruar nga Policia e Kosovës gjatë kontrollit të një automjeti në të Zubin Potokut. Për rastin janë shoqëruar dhe intervistuar dy persona

Sipas Policisë, rasti është regjistruar më 1 nëntor, rreth orës 16:15, kur zyrtarët e Stacionit Policor në Zubin Potok kanë ndaluar për kontroll një automjet me targa vendore.

Në automjet ndodheshin drejtuesi A.B., i lindur në vitin 1993, dhe pasagjeri I.M., i lindur në vitin 1973.

Gjatë kontrollit, drejtuesi ka deklaruar se posedonte armë, duke thënë se ato i kishte gjetur në një thes, disa metra larg vendit ku ishte ndaluar automjeti.

Policia ka kontrolluar automjetin dhe ka gjetur katër armë zjarri, përfshirë një AK-47 dhe tri armë të tipit M-48, të cilat janë sekuestruar.

Me urdhër të Prokurorit të Shtetit janë kontrolluar edhe adresat e banimit të dy të dyshuarve në Mitrovicë të Jugut, por gjatë këtyre kontrolleve nuk është gjetur ndonjë send i kundërligjshëm.

Të dyshuarit janë intervistuar në lidhje me rastin dhe, pas urdhrit të prokurorit, janë liruar në procedurë të rregullt.

Rasti po hetohet për veprën penale “Mbajtja në pronësi, kontroll ose posedim të paautorizuar të armëve”.

Policia u ka bërë thirrje qytetarëve që, në rast se hasin armë apo mjete të tjera të kundërligjshme, të mos i prekin dhe të njoftojnë menjëherë autoritetet në numrin emergjent 192.