Presidentja Osmani takohet me Sekretarin Rubio

Prishtinë, 20 shkurt 2026 20:28

Presidentja e Republikës së Kosovës, Vjosa Osmani, ka theksuar vendosmërinë e përbashkët të Kosovës dhe Shteteve të Bashkuara të Amerikës për mbrojtjen e paqes dhe garantimin e një të ardhmeje më të sigurt për brezat e rinj, në 18-vjetorin e vendosjes së marrëdhënieve diplomatike ndërmjet dy vendeve.

Në një deklaratë pas takimit në Departamentin Amerikan të Shtetit, Osmani bëri të ditur se është pritur nga Sekretari i Shtetit, Marco Rubio, me të cilin ka diskutuar për thellimin e mëtejmë të aleancës strategjike ndërmjet Kosovës dhe SHBA-ve.

“Me SHBA-të jemi të bashkuar në vendosmërinë për të mbrojtur paqen dhe për të garantuar një të ardhme më të sigurt për brezat e rinj”, ka deklaruar Osmani.

Ajo nënvizoi se gjatë takimit është diskutuar për hapa konkretë për forcimin e partneritetit, të cilët, sipas saj, kanë rëndësi jetike për qytetarët e Kosovës. Presidentja falënderoi palën amerikane për përfshirjen e Kosovës në Bordin e Paqes, për mbështetjen e vazhdueshme ndaj sovranitetit dhe integritetit territorial të vendit, si dhe për praninë ushtarake amerikane në Kosovë, të cilën e cilësoi si kyçe për paqen dhe stabilitetin në rajon.

Osmani theksoi gjithashtu rëndësinë e anëtarësimit të Kosovës në NATO, si dhe hapjen e kapitujve të rinj të bashkëpunimit në fushën e ekonomisë dhe mbrojtjes, në kuadër të partneritetit strategjik me Shtetet e Bashkuara.

“Krah për krah me Shtetet e Bashkuara, mbetemi të përkushtuar ndaj forcimit të paqes dhe sigurisë, adresimit të sfidave të përbashkëta globale dhe avancimit drejt integrimit euroatlantik të Kosovës”, ka përfunduar ajo.