Në seancën solemne të Kuvendit përveç Listës Serbe mungojnë edhe deputetët Duda Balje dhe Adem Hoxha

Prishtinë, 17 shkurt 2026 18:18

Në Kuvendin e Kosovës është mbajtur sot seanca solemne me rastin e 18-vjetorit të shpalljes së pavarësisë së Kosova.

Në këtë seancë morën pjesë presidentja e Republikës së Kosovës, Vjosa Osmani – Sadriu, deputetë të legjislaturës aktuale, kabineti qeveritar, përfaqësues të institucioneve të pavarura, si dhe mysafirë të ftuar.

Seanca u hap me intonimin e himnit shtetëror dhe me fjalime që vlerësuan rrugëtimin 18-vjeçar të shtetit, sfidat dhe arritjet në konsolidimin e institucioneve demokratike dhe në forcimin e subjektivitetit ndërkombëtar.

Gjatë fjalimeve u theksua rëndësia e unitetit politik dhe institucional në proceset shtetformuese, si dhe nevoja për bashkëpunim ndërmjet komuniteteve që jetojnë në Kosovë.

Megjithatë, në këtë seancë solemne u vu re mungesa e deputetëve të Lista Serbe, si dhe e dy deputetëve nga komunitetet joshumicë, Duda Balje dhe Adem Hoxha.

Mungesa e përfaqësuesve të Listës Serbe nuk përbën risi në aktivitete që lidhen me përvjetorin e pavarësisë, duke qenë se ky subjekt politik tradicionalisht ka mbajtur qëndrime të rezervuara ose kundërshtuese ndaj shënimit të 17 Shkurtit si festë shtetërore, shkruan Veritasinfo.

Në këtë kontekst, në qarqe politike është komentuar se mungesa e Adem Hoxhës – i cili në të kaluarën ka qenë pjesë e Listës Serbe, mund të ngrejë dyshime për ndikim të vazhdueshëm politik apo koordinim të qëndrimeve me këtë subjekt.

Megjithatë, deri më tani nuk ka asnjë deklarim zyrtar që të konfirmojë një gjë të tillë, dhe arsyet e mungesës së tij, si dhe të deputetes Balje, nuk janë bërë publike.

Ndonëse të gjitha komunitetet në Kosovë, përfshirë komunitetin boshnjak, përveç Listës Serbe, e njohin 17 shkurtin si Ditën e Shtetësisë së Kosovës, është e çuditshme mungesa e saj në këtë seancë.

Megjithatë, seanca u mbyll në një atmosferë solemne, ndërsa mesazhet kryesore mbetën të fokusuara në forcimin e institucioneve dhe në ruajtjen e unitetit politik në momentet me rëndësi shtetërore.