Kosova në listën e vendeve të sigurta, Koçiu: Konfirmon konsolidimin e shtetit të së drejtës

Prishtinë, 12 shkurt 2026 18:48

Ministrja për Punët e Brendshme në Shqipëri, Albana Koçiu e cilësoi si një lajm të mirëpritur votimin në Parlamentin Evropian për të përfshirë zyrtarisht Republikën e Kosovës në listën e vendeve të origjinës të cilat konsiderohen të sigurta.

Sipas, Koçiut ky votim “konfirmon pjekurinë institucionale dhe arritjet në konsolidimin e shtetit të së drejtës”.

Koçiu nënvizoi më tej se ky progres është një tregues i forcimit të stabilitetit në Ballkanin Perëndimor dhe një provë se rrugëtimi i rajonit tonë drejt integrimit evropian është një proces i pakthyeshëm.

“Shqipëria do të mbetet gjithmonë zëri më i fortë në mbështetje të Kosovës në çdo tryezë ndërkombëtare, me bindjen se konsolidimi i statusit ndërkombëtar të Kosovës është kusht i domosdoshëm për paqen dhe progresin e pakthyeshëm të rajonit tonë drejt Bashkimit Evropian”, shkruan Koçiu.

Gjithashtu ministrja uroi homologun Xhelal Sveçla për rikonfirmimin në detyrën e ministrit të Punëve të Brendshme në qeverinë e re të kryeministrit Kurti.

Koçiu shprehu besimin se “bashkëpunimi ynë do të vijojë me vendosmëri drejt standardeve evropiane, si prioritet i agjendës sonë të përbashkët për më shumë siguri për qytetarët e vendeve tona”.