Arrestimi i Avni Qenajt nga Serbia konfirmon targetimin e ish-ushtarëve të UÇK-së

Prishtinë, 25 nëntor 2025 18:48
Arrestimi i Avni Qenajt, një ish-ushtar dhe veteran i Ushtrisë Çlirimtare të Kosovës nga Prizreni, ka rikthyer sërish në qendër të vëmendjes praktikat e Serbisë ndaj ish-pjesëtarëve të UÇK-së. Qenaj u ndalua sot nga autoritetet serbe gjatë një kontrolli rutinë, por që u shndërrua në arrestim sapo zyrtarët serbë vërejtën kartelën e tij të veteranit të UÇK-së – një element që prej vitesh po përdoret nga Serbia si pretekst për ndalime të tilla.

Sipas informacioneve të bëra publike nga Gazmend Syla, nënkryetar i Organizatës së Veteranëve të Ushtrisë Çlirimtare të Kosovës, Qenaj kishte udhëtuar më parë përmes territorit serb pa asnjë pengesë. Megjithatë, ndalimi i sotëm shfaq edhe një herë qasjen selektive dhe shpesh represive të organeve serbe të sigurisë, të cilat vazhdojnë të mbajnë lista dhe hetime të njëanshme kundër ish-pjesëtarëve të UÇK-së, duke i trajtuar ata si të dyshuar, pavarësisht mungesës së akuzave konkrete.

Rasti i Qenajt nuk është i izoluar. Gjatë viteve të fundit, Serbia vazhdimisht ka ndaluar e arrestuar ish-ushtarë të UÇK-së nën pretendime të ndryshme, kryesisht të bazuara në dosje të diskutueshme, të përpiluar njëanshmërisht nga institucionet serbe të drejtësisë. Këto veprime janë interpretuar gjerësisht në Kosovë si përpjekje politike për të kriminalizuar luftën çlirimtare dhe për të ushtruar presion ndaj qytetarëve të Kosovës që udhëtojnë përmes apo drejt Serbisë.