Kosova ndalon importin e shpezëve nga disa rajone të Gjermanisë

Prishtinë, 19 nëntor 2025 18:39

Agjencia e Ushqimit dhe Veterinarisë së Kosovës (AUV) ka njoftuar sot se ka bërë plotësim-ndryshimin e vendimit për ndalesën e importit të shpezëve dhe nënprodukteve të tyre nga Gjermania, duke shfuqizuar vendimin e datës 30.10.2025 dhe duke vendosur kufizime të reja të synuara.

Sipas AUV-së, vendimi bazohet në raportet më të fundit të Organizatës Botërore për Shëndetin e Kafshëve (WOAH), raportin e Komisionit Evropian të datës 28.10.2025 dhe Raportin e Autoritetit Kompetent të Gjermanisë të datës 12.11.2025, të cilat konfirmojnë praninë e gripit të shpezëve me patogjenitet të lartë (HPAI–H5N1) në disa ferma në Gjermani.

Në përputhje me Ligjin e Veterinarisë Nr. 2004/21, Kosova do të lejojë importin e shpezëve dhe nënprodukteve të tyre nga Gjermania, me përjashtim të tetë zonave administrative të prekura nga H5N1: Lower Saxony, Bavaria, Brandenburg, Baden-Württemberg, North Rhine-Westphalia, Thuringia, Mecklenburg-Western Pomerania dhe Schleswig-Holstein.

Importi i shpezëve të gjalla, mishit të shpezëve dhe nënprodukteve të tyre që origjinojnë nga këto zona ndalohet menjëherë.

AUV thekson se ndalesa do të mbetet në fuqi deri në vlerësimin e radhës nga autoritetet vendore dhe ndërkombëtare.

“AUV do të vazhdojë të monitorojë me kujdes situatën epidemiologjike dhe të bashkëpunojë me institucionet vendore dhe ndërkombëtare për parandalimin e përhapjes së sëmundjes. Publiku dhe operatorët ekonomikë do të njoftohen me kohë për çdo ndryshim të mundshëm”, thuhet në njoftim.