Serbia ndalon suvenire që tregojnë realitetin: Kosova nuk përfshihet në hartë

Prishtinë, 13 nëntor 2025 08:22

Ministria e Tregtisë e Serbisë njoftoi se ka konfiskuar rreth 900 magnetë suveniresh dhe ka pezulluar shitjen e tyre sepse harta e Serbisë në to nuk përfshinte Kosovën.

“Magnetët shkaktuan shqetësim midis qytetarëve serbë dhe u panë si një njohje e pavarësisë së Kosovës”, raportojnë mediat serbe.

Inspektimi u krye më 10 nëntor në një dyqan në pronësi të shtetasve kinezë, pas një denoncimi nga qytetarët. Gjatë inspektimit u përcaktua se po shiteshin mallra në kundërshtim me “rregulloret”, prandaj u hoqën nga qarkullimi 871 magnete dhe varëse, si dhe nëntë magnete në formën e Serbisë ku nuk përfshihej harta e Kosovës, thuhet në deklaratën e ministrisë serbe.

Ky rast evidenton një problem të dukshëm për autoritetet serbe: realiteti faktik i hartës së Serbisë pa Kosovën është i pamohueshëm, dhe çdo produkt që reflekton këtë pamje bie në konflikt me narrativën zyrtare të shtetit. Për autoritetet e Beogradit, ky është një pengesë e vështirë për t’u menaxhuar, pasi qeveria duhet të ndërtojë politika për të kontrolluar perceptimin publik, ndërkohë që realiteti në harta dhe suvenire tregojnë një gjendje të pakontestueshme – Kosovën si shtet të pavarur.