Vërtetimet mjekësore, një nga dëshmitë e manipulimit të procesit zgjedhor nga Lista Serbe në Kllokot

Kllokot, 15 tetor 2025

Lista Serbe në komunën e Kllokotit duket se ka përdorur çdo metodë për të manipuluar procesin zgjedhor të së dielës. Një nga këto metoda janë vërtetimet mjekësore, të lëshuara ditën e zgjedhjeve nga persona që besohet të jenë anëtarë të Listës Serbe.

Dokumenti, i cili është siguruar nga Veritasinfo, mban vulën e institucioneve shëndetësore serbe dhe ka mundësuar qytetarëve serbë të votojnë më 12 tetor.

Këtë dukuri e ka denoncuar kandidati për kryetar të Komunës së Kllokotit, Arber Emini. I pyetur nga Veritasinfo lidhur me këto vërtetime, Emini ka deklaruar se janë më shumë se 250 dokumente të tilla që janë lëshuar ditën e zgjedhjeve.

“Deri në ora 15:00 qytetarët serbë kanë votuar me këto vërtetime, sepse komisionerët nuk i kanë njohur si të falsifikuara. Nuk e kanë ditur që janë false,” tha Emini, duke shtuar se një veprim i tillë është i ndaluar.

“Janë përdorur për të votuar vetëm qytetarët që mbështesin Listën Serbe, me qëllim kontrollimin e votës, sepse votimi me asistencë ishte i ndaluar nëse votuesi nuk posedonte dokument të vlefshëm të Republikës së Kosovës para datës së zgjedhjeve,” shtoi ai.

Edhe komisioneri Flamur Sherifi, i angazhuar në tavolinën ndihmëse në qendrën e votimit në Kllokot, konfirmon këto raste. Ai thotë se ky skenar ishte i përgatitur disa ditë më parë, pasi qytetarët ishin pajisur me vërtetime të datës 9 tetor, siç shihet edhe në dokumente.

“Nga Komisioni Qendror i Zgjedhjeve na informuan me vonesë se nuk duhej lejuar votimi me këto vërtetime, por kur arriti lajmi, ishte tepër vonë,” shprehet Sherifi.