MPJD kërkon nga bashkësia ndërkombëtare të reagojë ndaj arrestimeve të kosovarëve në Serbi – qytetarët t’i shmangin udhëtimet nëpër Serbi

Prishtinë, 10 shtator 2025

Ministria e Punëve të Jashtme e Kosovës ka kërkuar nga bashkësia ndërkombëtare të reagojë urgjentisht ndaj praktikave të Serbisë, e cila po shpeshtuar ndalimet dhe arrestimet e qytetarëve të Kosovës.

Të martën, MPJD-ja ka konfirmuar arrestimin e Hazir Hazirit nga autoritetet e Serbisë, në pikën kufitare në Merdarë, gjatë hyrjes së tij në territorin serb me automjet privat.

“MPJD gjithashtu nënvizon nevojën urgjente për reagim nga ana e Bashkësisë Ndërkombëtare ndaj praktikave represive të autoriteteve serbe, të cilat bien ndesh me parimet themelore të së drejtës ndërkombëtare dhe me konventat ndërkombëtare për të drejtat e njeriut. Rritja e rasteve të ndalimeve dhe maltretimeve të qytetarëve të Republikës së Kosovës nga autoritetet serbe përbën shkelje të frymës së dialogut dhe të marrëveshjeve të nënshkruara mes dy palëve”, thuhet në një njoftim të MPJD-së.

Kjo ministri në një njoftim publik në Facebook ka thënë se pas marrjes së informacionit për këtë rast, Zyra Ndërlidhëse e Kosovës në Serbi ka nisur angazhimin përmes kanaleve zyrtare e diplomatike për të siguruar informacione të sakta e të plota mbi ndalimin e Hazirit.

Ministria e Punëve të Jashtme ka ripërsëritur thirrjen që të shmangen udhëtimet nëpërmjet territorit të Serbisë, derisa nënvizon nevojën urgjente për reagim nga ana e Bashkësisë Ndërkombëtare.