Ambasadori amerikan në NATO: Po e ndjekim me kujdes çka po ndodh në Republikën Srpska dhe Serbi që situata të mos shndërrohet në konflikt rajonal

Bled, 02 shtator 2025

Një nga panelet e Forumit Strategjik të Bledit, ambasadori amerikan në NATO, Matthew G. Whitaker, deklaroi se Shtetet e Bashkuara po ndjekin me kujdes zhvillimet në Serbi dhe në entitetin e Republikës Srpska (RS), duke theksuar se prioriteti kryesor është parandalimi i çdo skenari që mund të përshkallëzojë në një konflikt rajonal.

“Po e monitorojmë shumë nga afër gjithçka që po ndodh si në Republikën Srpska ashtu edhe në Serbi. Aktualisht jemi të fokusuar që situata të mos degradojë në një konflikt potencial rajonal,” tha Whitaker, raporton Klix.ba.

Ai theksoi se ruajtja e stabilitetit në Ballkanin Perëndimor mbetet një qëllim i rëndësishëm, jo vetëm për Shtetet e Bashkuara, por edhe për aleatët evropianë në kuadër të NATO-s, të cilët kanë detyrimin të veprojnë së bashku në raste krizash.

Ambasadori amerikan shtoi gjithashtu se NATO është i përgatitur të ofrojë si forca sigurie, ashtu edhe presion politik për të garantuar paqen dhe stabilitetin në rajon.

I pyetur për mundësinë e një takimi mes presidentit amerikan Donald Trump dhe presidentit serb Aleksandar Vuçiq apo liderit të Republikës Srpska, Milorad Dodik, Whitaker u përgjigj se aktualisht nuk ka asnjë paralajmërim për një takim të tillë.

“Nëse një takim i tillë do të ndodhte, ai do të kishte për qëllim përparimin e paqes dhe stabilitetit – jo forcimin e pozitës politike të ndonjë lideri. Presidenti Trump nuk e bën këtë,” u shpreh ambasadori.

Ai e përshkroi Trumpin si një “tregtar dhe paqebërës”, i fokusuar në rezultate dhe krijimin e mundësive për progres.

“Nëse ekziston një mundësi për të avancuar vlerat dhe interesat amerikane – atëherë një takim mund të ndodhë. Por nuk jam këtu për të paralajmëruar ndonjë takim me udhëheqësit e Serbisë apo të Republikës Srpska,” përfundoi Whitaker.