Osmani: Kosova po fuqizon industrinë e mbrojtjes, synon anëtarësim në NATO

24 gusht, 2025

Presidentja e Kosovës, Vjosa Osmani, ka marrë pjesë në Forumin Evropian të mbajtur në Austri, ku diskutoi mbi të ardhmen e Kosovës, zhvillimet gjeopolitike që prekin vendin dhe perspektivën e Bashkimit Evropian.

Ajo theksoi se një nga prioritetet strategjike mbetet anëtarësimi në NATO, duke theksuar se sa më shumë shtete të Ballkanit Perëndimor të jenë pjesë e Aleancës, aq më të sigurta do të jenë territoret e tyre. Osmani shtoi se Kosova jo vetëm do të përfitonte nga kjo anëtarësi, por edhe do të kontribuonte në mënyrë të drejtpërdrejtë në fushën e sigurisë dhe mbrojtjes.

“Kosova po fuqizon industrinë e mbrojtjes, si në aspektin e armatimit, ashtu edhe në përgatitjen e ushtarëve tanë. Për vendet që ende përballen me sfida sigurie, është thelbësore që brezat e rinj të edukohen se liria dhe demokracia nuk janë të dhëna, por vlera për të cilat duhet të luftohet”, deklaroi Osmani.

Në fjalën e saj, Presidentja rikujtoi gjithashtu luftën e fundit në Kosovë dhe mbështetjen e aleatëve ndërkombëtarë në ndalimin e gjenocidit.