Lugina e Preshevës me platformë për raportimin e pasivizimit të adresave

Preshevë, 24 Gusht 2025

Deputeti shqiptar në Kuvendin e Serbisë, Shaip Kamberi, ka njoftuar për aktivizimin e një platforme të re për raportimin e rasteve të pasivizimit të adresave në Luginën e Preshevës.

“Për ta ndalur këtë proces dhe për të zbutur pasojat e tij të dëmshme, duhet që çdo ditë, me angazhimin tonë të përditshëm, të sensibilizojmë opinionin kombëtar dhe ndërkombëtar. Që angazhimi ynë për ndërkombëtarizimin e kësaj çështjeje të jetë i suksesshëm, është i domosdoshëm bashkëpunimi i çdo qytetari të prekur nga ky proces. Prandaj, për raportimin e rasteve apo marrjen e këshillave juridike, qytetarët mund t’i drejtohen platformës së hapur enkas për këtë qëllim nga Këshilli për të Drejtat e Njeriut në Luginë: www.pasivizimi.com”, ka shkruar ai në Facebook.

Kamberi ka theksuar se krijimi i kushteve të barabarta për jetë, përmes përfaqësimit të drejtë dhe proporcional në institucionet publike e shtetërore, ka qenë një nga parimet bazë të tri marrëveshjeve të nënshkruara, të cilat megjithatë nuk janë respektuar nga qeveria e Serbisë.

“Skenari i këtij procesi është tentativa që përmes pasivizimit selektiv të adresave të shqiptarëve, të krijohet një pasqyrë e rreme e strukturës demografike, e cila nuk përkon me gjendjen reale në terren. Pasivizimi i adresave sjell humbjen e shumë të drejtave civile, përfshirë edhe të drejtën e votës”, ka shkruar Kamberi.