Lista Serbe nuk certifikohet për zgjedhjet e 12 tetorit

Prishtinë, 21 gusht 2025

Komisioni Qendror i Zgjedhjeve nuk e ka certifikuar Listën Serbe për pjesëmarrje në zgjedhjet lokale të 12 tetorit. Me dy vota për, dy kundër dhe shtatë abstenime, kjo parti nuk mori mbështetjen nga anëtarët e KQZ-së.

Komisioni Qendror i Zgjedhjeve ka mbajtur sot mbledhjen e radhës për certifikimin e partive politike që kanë aplikuar për zgjedhjet e 12 tetorit. Një nga pikat më të debatueshme të rendit të ditës ishte certifikimi i partisë Lista Serbe dhe kandidatëve të saj.

Anëtari i Vetëvendosjes në KQZ, Sami Kurteshi, ka kundërshtuar certifikimin, duke e cilësuar Listën Serbe si parti me “trashëgimi terroriste” dhe duke akuzuar disa prej kandidatëve të saj se punojnë në mënyrë subversive kundër Republikës së Kosovës.
Derisa përfaqësuesi tjetër i kësaj partie, Uran Krasniqi, ftoi që të mos certifikohet Lista Serbe duke u thirrur edhe në nenin 14 për ndalimin e regjistrimit të partisë politike.

Përfaqësuesi i Partisë Demokratike të Kosovës në KQZ, Arianit Elshani, ka bërë të ditur se kjo parti abstenon në votimin për certifikimin e Listës Serbe për zgjedhjet lokale të tetorit.

“Si përfaqësues i PDK abstenojmë nga votimi për certifikimin e Listës Serbe me këta kandidatë, duke marrë parasysh këto informata por edhe gjithë ato diskutime që janë bë tash e sa kohë. Është dashur që këto informata të pranohen në mënyrë institucionale. Ne si PDK abstenojmë nga certifikimi, nuk jemi për certifikim. Abstenojmë nga votimi përderisa nuk kemi veprime nga institucionet e sigurisë, të cilat na tregojnë rrugën që duhet ndiqet për këtë parti”, tha Elshani.
Në anën tjetër, Sami Hamiti, përfaqësues i Lidhjes Demokratike të Kosovës në KQZ, duke komentuar diskutimet rreth Listës Serbe tha se Këshilli i Sigurisë Kombëtare është ai që duhet të mblidhet dhe ta zgjidhë këtë çështje, dhe se KQZ nuk janë ata që e shpallin dikë terrorist.

“Organet e sigurisë duhet me u marrë, me u mbledh e me thanë ky është një organizim terrorist, me i shpallë se nuk e shpallim na. Le ta kryejnë punën e vet, le të na e lehtësojnë punën ne.

Edhe anëtari i AAK-së në KQZ, Muharrem Nitaj ka deklaruar se dokumentet që posedon LVV dhe Sami Kurteshi është dashur të dërgohen në institucionet përgjegjëse”, tha Hamiti.