Prokuroria propozon dëbimin e Popoviqit për dy vjet nga Kosova, gjykata vendos pasdite

Prishtinë, 08 Gusht 2025

Prokuroria Speciale e Republikës së Kosovës ka propozuar që i akuzuari Igor Popoviq të dënohet me gjobë prej 3 mijë eurosh dhe dëbim për dy vjet nga Kosova, pas arritjes së marrëveshjes për pranimin e fajësisë ndërmjet palëve.

Sipas aktakuzës, më 18 korrik 2025, rreth mesditës, Popoviq ka mbajtur një fjalim publik në Rahovec, i cili, sipas Prokurorisë, ka pasur përmbajtje që nxisnin urrejtje dhe përçarje ndëretnike, përmes deklaratave të drejtuara ndaj grupeve etnike.

Prokurorja e rastit, Fikrie Zejnullahu, sqaroi se marrëveshja parashikon dënimin me gjashtë muaj burgim, i cili do të zëvendësohet me gjobë prej 3 mijë eurosh, si dhe dënimin plotësues të dëbimit nga territori i Kosovës për dy vjet. Ajo theksoi se marrëveshja është në përputhje të plotë me dispozitat ligjore dhe është mbështetur në provat ekzistuese.

“Aktakuzës i është bashkangjitur marrëveshja për pranimin e fajësisë, e lidhur sipas ligjit. I akuzuari është konsultuar në mënyrë të mjaftueshme me mbrojtësin e tij dhe marrëveshja përputhet me provat që e mbështesin aktakuzën. Për këtë arsye, i propozojmë gjykatës shqiptimin e dënimit të rënë dakord: gjashtë muaj burgim, i zëvendësuar me gjobë prej 3 mijë eurosh dhe dëbim për dy vjet nga Kosova”, deklaroi Zejnullahu.

Avokati i Popoviqit, Millosh Delliviq, konfirmoi se mbrojtja qëndron prapa marrëveshjes së arritur me Prokurorinë. “Janë përmbushur kushtet e nenit 230, pika 17 të Kodit të Procedurës Penale për pranimin e marrëveshjes nga gjykata,” tha ai.

Gjyqtari Kujtim Krasniqi njoftoi se shpallja e aktgjykimit do të bëhet sot në orën 14:00.

Igor Popoviq, ndihmësdrejtor në të ashtuquajturën Zyrë për Kosovën në Qeverinë e Serbisë, ishte arrestuar muajin e kaluar nga Policia e Kosovës, pasi kishte mbajtur një fjalim në Hoçë të Madhe të Rahovecit, ku ishte shprehur kundër Ushtrisë Çlirimtare të Kosovës.

Sipas Prokurorisë, deklaratat e tij kanë ndikuar negativisht në marrëdhëniet ndërmjet komuniteteve, duke nxitur mosbesim, tensione ndëretnike dhe rrezikuar bashkëjetesën në shoqërinë kosovare.

Popoviq e ka pranuar fajësinë për veprën penale për të cilën akuzohet.