Ramadani premton transparencë në hetimin për vrasjen e Arlinda Zekajt

Prishtinë, 9 nëntor 2026 15:36

Kryesuesi i Komisionit Hetimor Parlamentar për rastin e vrasjes së Arlinda Zekajt, Burim Ramadani, ka premtuar transparencë në punën e këtij komisioni, i cili po heton veprimet dhe mosveprimet institucionale që lidhen me këtë rast.

Komisioni ka mbajtur të hënën mbledhjen e radhës, e cila fillimisht u zhvillua me praninë e mediave, por më pas vazhdoi me dyer të mbyllura.

Ramadani ka bërë të ditur se Zyra e Kryeministrit ka dorëzuar raportet e Ministrisë së Drejtësisë dhe Ministrisë së Punëve të Brendshme, të cilat më herët ishin kërkuar nga komisioni. Sipas tij, kjo shënon fillimin e bashkëpunimit institucional për shqyrtimin e rastit.

Ndërkohë, gjatë mbledhjes janë shfaqur edhe mospajtime mes anëtarëve të komisionit.

Ramadani ka thënë se qëndrimet e ndryshme të anëtarëve janë bërë publike dhe se procesi nuk do të mbahet i fshehtë.

Në rend dite të mbledhjes ishin plotësim-ndryshimi i planit të punës dhe kalendarit të aktiviteteve, përgatitja e listës fillestare të dokumenteve që do t’u kërkohen institucioneve përkatëse, si dhe miratimi i buxhetit të komisionit.

Komisioni Hetimor Parlamentar është themeluar më 29 tetor nga Kuvendi i Kosovës dhe ka mandat deri në gjashtë muaj për të hetuar rrethanat institucionale të rastit të Arlinda Zekajt, e cila u vra më 25 tetor në Vitomiricë të Pejës, si dhe trajtimin institucional të dhunës në familje.