Nis eksporti i parë drejt Zvicrës pas hyrjes në fuqi të Marrëveshjes Kosovë–EFTA

Prishtinë, 2 tetor 2026 09:25

Një ditë pas hyrjes në fuqi të Marrëveshjes së Tregtisë së Lirë ndërmjet Kosovës dhe shteteve të EFTA-s, nga pika doganore në Dheu i Bardhë është nisur dërgesa e parë e produkteve kosovare drejt Zvicrës.

Dërgesa përbëhet nga shtëpi modulare të prodhuara nga kompania “Green House” nga Peja dhe paraqet një nga hapat e parë konkretë të zbatimit të marrëveshjes, e cila hyri zyrtarisht në fuqi më 1 tetor 2026.

Marrëveshja Kosovë–EFTA synon të krijojë kushte më të favorshme për bizneset kosovare dhe të lehtësojë eksportin e mallrave dhe shërbimeve drejt katër vendeve anëtare të EFTA-s: Zvicrës, Norvegjisë, Islandës dhe Lihtenshtajnit.

Në kuadër të marrëveshjes, eksportuesit kosovarë të produkteve industriale përfitojnë nga liberalizimi i tarifave doganore. Për disa produkte bujqësore parashikohen gjithashtu tarifa të reduktuara ose zero, si dhe kuota preferenciale, në përputhje me kushtet e përcaktuara në marrëveshje.

Marrëveshja parasheh mundësi më të favorshme edhe për eksportin e shërbimeve, me synimin që produktet dhe shërbimet nga Kosova të kenë prani më të madhe në tregjet e vendeve të EFTA-s.

Ministria e Industrisë, Ndërmarrësisë dhe Tregtisë ka bërë të ditur se do të vazhdojë të informojë dhe mbështesë bizneset për mundësitë që ofron marrëveshja, me synim rritjen e eksporteve, krijimin e partneriteteve të reja dhe zhvillimin ekonomik.

Dërgesa e parë drejt Zvicrës vjen kështu si një nga hapat e parë praktikë pas hyrjes në fuqi të marrëveshjes, duke i hapur bizneseve kosovare qasje më të favorshme në tregjet e vendeve të EFTA-s.